Ја основала меѓународната академија за ритмичка гимнастика „Небесна грација“, институција со речиси неограничени привилегии која може да организира натпревари според сопствени правила, заобиколувајќи ги руските и меѓународните сојузи.
Алина Кабаева е една од најголемите легенди на ритмичката гимнастика, жена чија спортска кариера беше исполнета со злато и слава. Со две олимписки медали, 14 светски и 21 европска, го зацврсти својот статус на икона. Но, децении по последниот настап на победничкиот пиедестал, нејзината слава повеќе не произлегува од спортските успеси, туку од длабоката мистерија што го опкружува нејзиниот приватен живот и наводната врска со рускиот претседател Владимир Путин. Иако Кремљ упорно негира каква било поврзаност освен професионална, низа новинарски истраги открија неверојатна приказна за моќ, богатство и живот во сенка, далеку од очите на јавноста.
Истражувачки новинари открија дека Кабаева живее во луксуз достоен за кралско семејство, со имот чија вредност се проценува на повеќе од 120 милиони долари.
Драгоцен камен во нејзината колекција недвижности е пентхаус од 2.600 квадратни метри во Сочи, опишан како „најголемиот стан во Русија“, опремен со приватно кино, базен, хелидром на покривот, јапонска градина и спа зона. Како и бројни други имоти, станот формално не се води на нејзино име. Наместо тоа, е регистриран на верни луѓе на Путин, мрежа на олигарси и блиски пријатели кои управуваат со огромно богатство наменето за личните потреби на рускиот претседател и неговото тајно семејство. Оваа практика овозможува вистинските сопственици да останат скриени, додека парите се слеваат од тајни фондови, како кипарската компанија „Ermira Consultants“.
Срцето на нејзиното скриено „царство“ наводно се наоѓа длабоко во шумите на националниот парк Валдај, на половина пат меѓу Москва и Санкт Петербург. Таму, на само 800 метри од раскошната „златна“ палата на Путин, изградена е нова дрвена вила исклучиво за неа и децата. Имотот е опкружен со строго обезбедување, а сателитските снимки откриваат дека со текот на времето на него е изградена голема детска играчка зона во сина и жолта боја, како и приватна картинг патека. Сè укажува дека токму тука, во целосна изолација, се одвива семејниот живот скриен од остатокот на светот.
Гласините за нивните деца со години се предмет на шпекулации, а истрага на независниот портал „Dossier Center“ откри дека парот наводно има два сина. Првиот, Иван, е роден во 2015 година во елитната швајцарска клиника "Sant’Anna", додека вториот, Владимир помладиот, е роден во Москва во 2019 година. Наводната реакција на Путин при раѓањето на првиот син, според извори, била: „Ура! Конечно! Момче!“. Колку биле важни швајцарските лекари за руското раководство сведочи и еден неверојатен детаљ – тимот што ја породил Кабаева бил поканет на воената парада на 9 мај 2019 година во Москва, каде настанот го следеле од VIP трибината.
Нејзиниот подем не бил ограничен само на приватната сфера. По спортската кариера, Кабаева брзо влезе во политиката и од 2007 до 2014 година беше пратеник во Државната дума како член на партијата „Единствена Русија“. Потоа, во 2014 година, без претходно искуство во медиумски менаџмент, ја презема функцијата претседател на управниот одбор на Националната медиумска група (NMG), моќен про-кремљски медиумски холдинг кој контролира дел од највлијателните телевизии и весници во Русија. Нејзината годишна плата се проценува на речиси девет милиони евра, што дополнително ги поттикна шпекулациите дека позицијата е награда за нејзината блискост со претседателот.
Во последните години, Кабаева повторно стана повидлива во јавноста, но под сопствени услови. Таа ја основа меѓународната академија за ритмичка гимнастика „Небесна грација“, институција со речиси неограничени привилегии која може да организира натпревари по сопствени правила. Овој потег ја доведе во директен судир со нејзината поранешна менторка Ирина Винер, долгогодишна доминантна фигура во руската гимнастика. Според упатени извори, Кабаева целосно ја надминала Винер, чиј влијание почнало нагло да слабее.
Целиот живот на семејството е обвиен со параноична тајност. Патуваат со оклопен воз кој застанува на тајни железнички станици затворени за јавноста, изградени во близина на резиденциите на Путин во Валдај, Сочи и околината на Москва. Околу Кабаева постои тесен круг на соработници, вклучително и нејзини роднини, кои ја придружуваат на сите патувања и чии потреби исто така се финансираат од тајни фондови. Поради блиската врска со Путин и улогата во пропагандната машинерија, таа се најде под санкции на САД, Европската унија и Велика Британија по инвазијата на Украина.
