Ако ноќе често се будите и станувате поуморни отколку што сте легнале, можеби е време да ги преиспитате вашите вечерни навики.

Познатиот британски лекар Амир Кан понуди неколку едноставни совети за сите кои се борат со несоница, истакнувајќи дека решението често не е во трендовите од „TikTok“ или во таблети, туку во подобрување на таканаречената хигиена на спиење, пишува „Unilad“.

Доктор Кан објаснува дека лошиот сон е штетен за речиси секој аспект од животот – од способноста за концентрација и донесување одлуки до крвниот притисок. Наместо да се посегнува по лекови, тој предлага усвојување здрави навики.

„Хигиената на спиење подразбира здрави навики, а добриот сон е клучен за менталното и физичкото здравје. Ако спиете лошо, да се обидеме да го поправиме тоа со следните чекори“, појасни тој и нагласи дека за првите резултати е потребна упорност.

„Понекогаш веќе неколку едноставни чекори можат да ја подобрат количината и квалитетот на сонот. Ако имате проблеми со спиењето, пробајте ги овие совети и бидете упорни две до четири недели, бидејќи толку е потребно за да почнат да делуваат.“

Доследен распоред е клучен

Иако изгледа едноставно, многумина го занемаруваат најважниот чекор – легнување и будење во исто време.

„Одржувајте доследен распоред на спиење. Обидете се да легнувате и да се будите приближно во исто време секој ден, дури и за викенд. Така го зајакнувате вашиот внатрешен биолошки часовник. Целете кон седум до осум часа сон секоја ноќ“, советува Кан.

Создадете релаксирачка вечерна рутина

Следниот чекор е воведување ритуали кои ќе му сигнализираат на телото дека е време за одмор.

„Создадете релаксирачка рутина пред спиење која ќе ви помогне да се смирите и да се подготвите за сон. Триесет до шеесет минути пред легнување, дозволете си топла бања или туш, лесно истегнување, медитација или читање книга – но не од електронски уред“, препорача лекарот.

Избегнувајте стрес и користење телефон пред спиење

Доктор Кан истакнува дека многумина прават лоши избори токму пред спиење.

„Запомнете, пред спиење избегнувајте емоционални или стресни разговори, како и било какви расправи поврзани со работа. Стресот е една од најчестите причини поради кои луѓето ноќе не можат да заспијат“, заклучи тој.