Трамп претставен како пират и поп-ѕвезда: Иран со сатирични содржини на социјалните медиуми

Анализите покажуваат дека хумористични и видеа генерирани од вештачка интелигенција се користат сè повеќе за оваа намена, вклучувајќи анимации и пародии насочени кон американскиот претседател Доналд Трамп и други западни политички актери, пишуваат светските медиуми.

Така, иранската амбасада во Јужна Африка објави видео во кое Трамп, претставен како Елтон Џон, пее: „Ако ме блокираш, тогаш и јас те блокирам“, со опис: „Денешниот музички хит: Блокада, од Трамп“.

Во друга објава, тој беше прикажан како пират заглавен на сред море, со порака за „сиромашните пирати од Персискиот Залив и Ормускиот теснец“. Генералниот конзулат на Иран во Мумбај, исто така, се приклучи на кампањата, која ги истакна воените капацитети на земјата со порака за „црвените пчели на Персискиот Залив“ и брзите ракетни чамци, со предупредување дека „ројот може брзо да го прикова непријателот“, завршувајќи го постот со позната филмска реплика: „Ова е само трејлер, целиот филм допрва треба да се појави“.

Според анализа објавена од Гардијан, овој тип содржина постигнува голем глобален дострел и покрај ограничувањата на интернет и притисоците врз медиумите во Иран. Академските соговорници проценуваат дека Техеран успешно ја искористил „комуникациската војна“ на социјалните мрежи, ангажирајќи ги помладите генерации креатори на содржини да обликуваат наратив за конфликтите и сопствената улога во регионот, а воедно ја предизвикал доминацијата на западните медиуми.

Овој дигитален наратив се одвива паралелно со реалните политички тензии. Соединетите Американски Држави и Иран одржаа разговори во Исламабад, но без конечен договор, оставајќи ја неизвесна иднината на кревкото двонеделно примирје. Американската делегација ја предводеа Џ.Д. Венс, Стив Виткоф и Џаред Кушнер, а разговорите не успеаја откако Иран не ги прифати клучните барања на Вашингтон, првенствено во врска со нуклеарната програма.

Сето ова, според написите, укажува дека социјалните мрежи стануваат клучна арена на современиот политички натпревар, во кој, покрај геополитичките конфликти, се води паралелна медиумска војна за обликување на глобалното јавно мислење.