Италија во последните години се бори со преголем број туристи – воведени се такси за посетителите во Венеција и ограничувања за најпосетените атракции. Сепак, и покрај мерките, земјата и понатаму многу сака да привлече луѓе – но не како туристи, туку како жители.
Многу помали општини и села низ Италија во последните години нудат недвижности за само 1 евро, со цел да се оживеат напуштените места и да се зголеми бројот на жители. Меѓутоа, прекрасниот регион Трентино, на северот од Италија, одлучи работите да ги постави поинаку – и повеликодушно.
Ако ве привлекуваат лозја, скијачки патеки, чисти езера и близината на Доломитите, можеби е време да ги спакувате куферите – бидејќи Трентино во 2026 година нуди 100.000 евра за оние што се подготвени да се преселат.
Во моментов се разгледуваат 33 места, а Советот на регионот Тренто издвои 10 милиони евра во период од две години за спроведување на овој проект. Претседателот на регионот, Маурицио Фугати истакна дека оваа „експериментална иницијатива“ е осмислена со цел да се зајакне општествената поврзаност и животот во заедницата во овој дел од Италија.
Секако, постојат и неколку правила. Парите не се наменети за безгрижно уживање во италијанскиот живот, туку исклучиво за обнова на напуштените куќи. Од вкупниот износ, 20.000 евра може да се искористат за купување недвижност, додека преостанатите 80.000 се предвидени за реновирање.
Исто така, обврзани сте во таа куќа да живеете најмалку 10 години – или евентуално да ја изнајмувате по „умерена“ цена – во спротивно ќе мора да го вратите добиениот износ.
Постојат уште неколку ограничувања. Ако веќе живеете во регионот и сте помлади од 45 години, не можете да конкурирате за оваа програма. Покрај тоа, вкупната вредност на реновирањето не смее да надмине 200.000 евра, што значи дека можете дополнително да вложите најмногу 120.000 евра од својот џеб.
