Рид Вајсман, астронаут кој ја предводи мисијата што ќе стигне најдалеку во истражувањето на вселената досега, веќе неколку години е самохран татко. Откако еднаш заедно со својата млада сопруга поминал низ голема животна борба, во неговиот живот пристигнала уште една …

Мисијата „Artemis II“, во рамките на која леталото „Orion“ моментално се движи кон Месечината, е главна тема во светот во изминатите денови, како и нејзините астронаути кои веројатно се меѓу најхрабрите луѓе во овој момент.

Екипажот на мисијата „Artemis II“ го сочинуваат командантот Рид Вајсман, пилотот Виктор Гловер, борбениот пилот и физичар Џереми Хансен, додека единствената жена во тимот е специјалистката за мисијата Кристина Кох.

Како што минуваат деновите, дознаваме сè повеќе за храбрите астронаути кои ќе ја обиколат Месечината и ќе ја видат нејзината темна страна, а за американските медиуми особено интересен е командантот на мисијата.

И астронаут и самохран татко

Рид Вајсман се соочи со еден од најголемите животни предизвици – заминување во вселената како самохран татко на две ќерки, по смртта на сопругата Керол.

Керол Тејлор Вајсман починала на 17 мај 2020 година во нивниот дом во Френдзвуд, Тексас, по пет тешки години борба со рак. Имала само 46 години, а Вајсман потоа останал сам и продолжил да ги одгледува нивните девојчиња.

Наскоро сфатил дека покрај оваа голема одговорност има уште една – мисија што ќе го однесе него и неговиот екипаж подалеку од Земјата од било кој досега.

„Ги сакам овие две дами и се качувам на таа ракета како многу горд татко“, напиша Вајсман на „Instagram“ покрај селфи со ќерките пред лансирањето на ракетата „Space Launch System“ (SLS).

Рид Вајсман е ветеран на Морнарицата на САД, пилот-инженер роден во Балтимор. „NASA“ го избра за астронаут во 2009 година, а во 2014 година служеше како инженер на лет на Меѓународната вселенска станица за време на Експедицијата 41.

Додека неговата сопруга Керол била жива, Рид привремено паузирал со летовите за да служи во астронаутскиот оддел, најпрво како заменик, а потоа и како шеф.

Ги подготви ќерките за најлошото

Откако се вратил во активна летачка служба во ноември 2022 година, „NASA“ го повикала да се приклучи на мисијата „Artemis II“, која бара голема храброст. Тој прифатил.

„Прошетав со децата и им реков: „Еве каде се тестаментот и другите документи, и ако нешто ми се случи, еве што ќе биде со вас“. Тоа е едноставно дел од овој живот – изјави Рид Вајсман на прес-конференција пред патувањето во вселената.

Како што се наведува во неговата официјална биографија, и покрај сите историски достигнувања, најголемата награда му е животот што го има со ќерките. Неговите девојчиња Ели и Кетрин секогаш се покрај него, а пред лансирањето му подготвиле мало изненадување.

„Кога ги пакуваш работите за Месечината и откриваш дека ќерка ти во торбата ти ставила колачиња што сама ги направила. Моето срце не може повеќе да го издржи ова!“, напиша Вајсман на „Instagram“ неодамна.

Татко му живее за да го види на другата страна од Месечината

Покрај смртта на сопругата, семејството на Рид поминало низ низа тешки искушенија, а тој на Земјата оставил уште грижи. Неговиот татко, кој има 83 години, моментално исто така се бори со рак, а токму тоа што неговиот син ќе влезе во историјата му дало сила да продолжи.

„Сакав да поживеам за да го видам тоа“, изјави постариот Вајсман во интервју за „Baltimore Banner“.

Нешто порано, мајката на астронаутот починала по долга борба со Алцхајмерова болест.