Историска пресуда

По седумнеделно судење и повеќе од осум дена советување, поротата во Вишиот суд во Лос Анџелес утврди дека „Meta“ и „YouTube“ биле немарни во дизајнот на своите платформи, дека знаеле за опасностите, не ги предупредиле корисниците за ризиците и со тоа предизвикале значителна штета на тужителката.

Тужбата ја поднесе денес 20-годишната Кејли (презимето не е јавно), тврдејќи дека платформите како дете ја направиле зависна и кај неа предизвикале анксиозност, телесна дисморфија и суицидални мисли.

Компаниите се задолжени да ѝ исплатат вкупно 3 милиони долари отштета, при што „Meta“ носи 70 отсто од одговорноста, а „YouTube“ 30 отсто. Во истиот случај тужени беа и „Snap“ и „TikTok“, кои се спогодија пред почетокот на судењето.

„Не се согласуваме со пресудата“

Од „Meta“ соопштија дека ги разгледуваат следните чекори. „Со почит не се согласуваме со пресудата и ги проценуваме нашите правни опции“, изјави портпарол на компанијата.

„Google“, сопственик на „YouTube“, засега не ја коментираше пресудата. За време на судењето, двете компании ги негираа тврдењата од тужбата и ја оспоруваа тезата дека нивните платформи можат да предизвикаат зависност, истакнувајќи безбедносни функции како алатки за родителска контрола и ограничувања за тинејџери.

Преседан за стотици слични тужби

Овој случај е првиот од повеќе од 1.500 слични тужби против компании од социјалните медиуми што стигна до суд, а неговиот исход може да го насочи решавањето на останатите. Низа порази на суд би можеле технолошките гиганти да ги чинат милијарди долари и да ги принудат на промени.

Компаниите подоцна оваа година ќе се соочат и со тужби од училишни окрузи и државни обвинители ширум земјата, во правен притисок што некои го споредуваат со „моментот на вистината“ за технолошката индустрија, слично на оној за тутунската индустрија. Пресудата доаѓа само ден откако порота во Ново Мексико ја прогласи „Meta“ за одговорна за неуспех во заштитата на децата од сексуални предатори на своите платформи.

Повик за поголема заштита на децата

За семејствата и активистите кои со години повикуваат на построги мерки, оваа одлука е клучен момент. Многу родители, кои патувале од секаде во Соединети Американски Држави за да го следат судењето, се надеваат дека пресудата ќе го поттикне Конгресот да донесе посеопфатни закони за интернет-безбедност.

„Гигантите на социјалните мрежи никогаш немаше да се соочат со судење доколку безбедноста на децата ја ставеа пред ангажманот на корисниците“, изјави Џејмс Штајер, основач на организацијата "Common Sense Media".

„Наместо тоа, ги сокриле сопствените истражувања кои покажувале дека децата трпат штета и ги искористиле децата и општеството како лабораториски заморчиња во масовни, неконтролирани и исклучително профитабилни експерименти. Сега директорите се повикуваат на одговорност.“