Не е ретка појава на Марс да се открие природна структура со толку правилна форма, на што човечкиот мозок едноставно не може да одолее, а да не се запраша дали можеби е создадена вештачки.
Марс може да изгледа како тивка и пуста планета, но неговите пејзажи и понатаму воодушевуваат со необични формации кои ја будат имагинацијата. Меѓу нив се издвојува формација налик на триаголна пирамида во кањонот Кандор, огромен марсовски кањон обликуван од ветерот.
Пирамидалната структура првпат привлече внимание уште во 2002 година, кога независниот истражувач Вилмер Фауст забележал необичен детаљ на снимката E06-00269 од „Mars Global Surveyor“ („MGS“). Оттогаш, структурата популарно е наречена „Candorov Tetrahedron“. Неодамна, американскиот независен режисер Брајан Кори Добс дополнително го зголеми интересот за оваа формација, споделувајќи фотографии на платформата „X“ и поставувајќи прашање какви природни процеси можат да создадат толку правилни форми на Марс.
Сликите што кружат на интернет се базираат на реални податоци добиени од леталата на „NASA“ во орбита околу Марс, кои првпат ја фотографирале областа на кањонот Кандор во 2001 година, пишува порталот „Science Alert“.
Подоцнежните снимки направени со „Mars Reconnaissance Orbiter“, особено со камерата „HiRISE“, ја прикажуваат оваа регија со поголема резолуција. Иако формацијата изгледа импресивно одблизу, нејзината мистичност се губи кога се набљудува во поширок контекст, каде станува јасно дека станува збор за нерамна возвишеност обликувана од ерозија, слична на околниот терен. Самиот кањон Кандор е формиран низ милијарди години под влијание на вода, ветер, свлечишта и можни тектонски активности.
On Mars, there is a three-sided pyramid the size of the Great Pyramid in Egypt.
— Brian Cory Dobbs (@BrianCoryDobbs) March 16, 2026
Discovered by Keith Laney. pic.twitter.com/TyDG4cHVRQ
Геолозите ваквите формации ги нарекуваат „позитивни релјефни изданоци“, односно трајни остатоци од карпи кои остануваат по ерозијата на помеките слоеви околу нив. „Candorov Tetrahedron“ има дијаметар од околу 290 метри и висина од 145 метри – нешто поголем од просечниот ваков релјефен облик, но целосно во рамки на природните процеси на Марс.
Слични природни „пирамиди“ постојат и на Земјата, како што се Серо Туса во Колумбија и пирамидалните ридови во кинеската провинција Гуиџоу.
При подетално набљудување се забележуваат нерамни жлебови и структури на површината обликувани од постојаните марсовски ветрови, без геометриска совршеност. Бидејќи човечкиот мозок има тенденција да препознава обрасци, ваквите природни форми можат погрешно да се толкуваат како вештачки создадени, но привлечноста на Марс не зависи само од илузиите што неговиот пејзаж ги создава во човечкиот ум.
Неговиот суров и разграден пејзаж, прикажан во извонредни детали благодарение на современите снимки од орбитални летала и ровери на површината, сведочи за геолошките сили и убавината обликувана од ветерот низ милиони, па дури и милијарди години.
