Сè почнало како забавна анегдота во телевизиски пренос од турнирот во Мајами, а завршило со тешки обвинувања и навреди на социјалните мрежи, оставајќи ги навивачите да се прашуваат што е вистинската вистина.

Даниел Колинс, која закрепнува од повреда и работи како стручна коментаторка за „Tennis Channel“, во нов сегмент наречен „Storytime with Danielle“ раскажала приказна за својот колега. Водителот започнал со тврдење дека Муте „ѝ дофрлал“ додека тренирала. Колинс потоа го презела зборот и тврдела дека Французинот ѝ се јавувал во приватни пораки.

„Во основа му реков: ’Ако така ќе флертуваш со мене, ќе мора да имаш посилен сервис‘“, изјавила Колинс во живо во програмата. „На некои им е важна висината, на некои личноста, но на крајот сè се сведува на силни форхенди и сервиси“, додала таа.

Американката потоа приказната ја поврзала со својот профил на апликација за запознавање, кој стана вирален затоа што во него навела дека бара „традиционален сопруг“ и дека кај неа важи правилото „зона без ниски кралеви“ (no short kings zone). Таа тврдела дека Муте престанал да ја следи на социјалните мрежи по таа објава, за потоа повторно да ѝ се јави по победата во Мајами за да се пофали со „сите силни сервиси што ги удирал“.

Бесниот одговор на Муте: „Никогаш не сум те ни следел“

Кратко потоа се огласил и Корентин Муте. Французинот, инаку познат по својот темперамент, се огласил на социјалната мрежа Икс и жестоко ги демантирал нејзините наводи.

„Како можам да престанам да те следам кога никогаш не сум те ни следел?“, напишал Муте, директно обвинувајќи го „Tennis Channel“ дека дозволува во етер да се изнесуваат „такви глупости“. „Ти ме следеше мене. Ти ме праша да играме мешани двојки. Никогаш не сум те ни заследил“, додал тој.

Муте потоа ѝ порачал на американската тенисерка дека е „подготвена да каже што било само за луѓето да зборуваат за неа“, а ѝ советувал и „да научи да се сака себеси за да не мора да прави глупости поради туѓа љубов“. Иронично, целата расправа околу висината е дополнително апсурдна ако се земе предвид дека Колинс е висока 178 сантиметри, а Муте е два сантиметри повисок, односно висок 180 сантиметри.

Кои се актерите во овој необичен конфликт?

Овој јавен конфликт во фокусот стави две многу различни, но подеднакво необични личности.

Даниел Колинс, поранешна седма тенисерка во светот е позната по исклучително агресивниот стил на игра и огнениот темперамент. Нејзин најголем успех во кариерата е финалето на Австралија опен во 2022 година, а може да се пофали и со освојување на престижниот ВТА 1000 турнир во Мајами во 2024 година. Таа претходно најавила повлекување, но по одличните резултати решила да му се врати на тенисот.

Корентин Муте, француски леворак е еден од најнепредвидливите АТП играчи. Познат е по честите скратени топки, ексцентричното однесување и расправиите со судиите. Во кариерата има играно три АТП финалиња, а негов најдобар пласман е 31. место. Надвор од теренот, се занимава со рап музика и важи за еден од најконтроверзните, но и најзабавните играчи.