Робот во ресторан од ланецот „Haidilao“ во Калифорнија стана светски познат откако, поради технички дефект, почна неконтролирано да „танцува“ и да крши садови, принудувајќи го персоналот да интервенира.
Инцидентот се случил во еден од објектите на популарниот кинески „hot pot“ ресторан во областа Беј Ериа, познат по користењето технологија и роботска асистенција во услугата. Роботот, кој е дизајниран да им помага на вработените и да ги забавува гостите, одеднаш почнал да „танцува“ и не можел да се запре.
Снимката од настанот, која брзо се прошири на социјалните мрежи, го прикажува роботот како енергично се движи низ ресторанот. Неговото континуирано „танцување“ брзо прераснало во хаос, бидејќи изгледало како да ги игнорира командите и продолжува неконтролирано да се движи. Гостите го следеле во чудење, додека некои ја снимале ситуацијата со своите телефони, пренесува „NDTV“.
Тројца членови од персоналот на крајот реагирале за да ја стават ситуацијата под контрола. Внимателно го совладале роботот и се обиделе да ги запрат неговите движења, водејќи сметка никој да не биде повреден.
SE RE PUDRIO EN UN RESTAURANTE CHINO
— ElBuni (@therealbuni) March 17, 2026
Un robot se canso de laburar, rompió la vajilla y se puso a tirar los pasos prohibidos
Lo tuvieron que contener entre varios pic.twitter.com/seJNr3XAV3
Иако нема повредени, настанот отвори прашања за сигурноста и доверливоста на сервисните роботи во прометни јавни простори. Истовремено, бројни корисници на социјалните мрежи најдоа хумор во ситуацијата, опишувајќи ја како необична и забавна.
„Haidilao“ е познат ширум светот по уникатното искуство при јадење, често со употреба на роботи и напредни системи за услуга на гостите. Сепак, овој инцидент покажува дека и современата технологија понекогаш може да потфрли на неочекувани начини.
Компанијата засега не се огласи детално за причината за дефектот, додека виралното видео и натаму привлекува големо внимание кај корисниците.
