Пожарот избувнал во квартот Ал Куоз, а според Асошиејтед Прес, многу минувачи застанале да го гледаат огромниот столб од чад што се издига над градот. На новинар на АП не му било дозволено да се приближи до местото на пожарот, кој бил на улица без излез.

Службата за медиуми на владата на Дубаи соопшти на социјалните мрежи дека инцидентот се случил откако фрагменти од пресретната ракета паднале врз зграда во центарот на градот.

„Фрагментите по успешното пресретнување предизвикале мал инцидент на фасадата на зграда во центарот на Дубаи“, соопштија властите. Тие додадоа дека никој не е повреден во инцидентот, иако густиот чад од пожарот можел да се види од поголемиот дел од градот, па сè до луксузниот хотел Бурџ ал-Араб во форма на едро.

Војна меѓу САД и Иран

Конфликтот меѓу САД и Иран започна на 28 февруари кога американските и израелските сили започнаа координирани воздушни напади врз цели низ Иран, вклучувајќи воени бази, системи за воздушна одбрана и политичкото раководство на земјата.

Иран одговори со лансирање стотици ракети и беспилотни летала врз Израел, американски воени бази и сојузници на САД во регионот, вклучувајќи ги и земјите од Персискиот Залив.

Од почетокот на војната, нападите се проширија низ поголемиот дел од Блискиот Исток, таргетирајќи бродови и енергетска инфраструктура во Персискиот Залив, нарушувајќи го поморскиот сообраќај и глобалниот пазар на енергија.