Кибек случајно наишла на кампањата и останала запрепастена кога сфатила дека компанијата ги искористила нејзините фотографии за создавање AI лик без нејзина согласност и без какво било учество од нејзина страна.

Откривање на AI двојничката во реклама

„До денес дури и не знаев дека имам AI двојничка“, започна Кибек во своето видео. „Пријателка ми испрати модна реклама генерирана со вештачка интелигенција и нешто во неа веднаш ми изгледаше познато“.

Покажувајќи исечоци од рекламата покрај своите вистински фотографии, Кибек јасно покажа дека компанијата ги користела нејзините снимки за да создаде AI верзија за кампањата. Иако фризурата во рекламата ѝ била изменета, лицето било речиси исто.

Неверојатна сличност

Таа објасни дека фотографиите што компанијата ги искористила се направени во 2023 година, кога имала „mullet“ фризура. Во рекламата целосно ѝ ја промениле фризурата за да одговара на нејзината сегашна, значително пократка „pixie“ фризура.

Исто така малку ги доработиле и цртите на лицето, вклучувајќи ја бојата на очите, веѓите и пегите. Отишле дотаму што додале и малечка испакнатина што Кибек ја има на носот. Во коментарите луѓето изразија огорченост поради тоа што ѝ се случило на манекенката, а многумина истакнаа дека користењето на нечие лице без дозвола дефинитивно ја преминува етичката граница.

Уметниците против злоупотребата на AI

Користењето на вештачката интелигенција во многу делови од забавната индустрија стана голема причина за загриженост во последните три години, особено затоа што компаниите можат да користат AI-генерирани слики од луѓе без нивна согласност и без плаќање. Уште во 2024 година околу 11.500 креативни професионалци, меѓу кои актерката Џулијан Мур, писателот Џејмс Патерсон и музичарот Том Јорк од бендот „Radiohead“, со отворено писмо повикаа на забрана за користење дела создадени од луѓе за тренирање на вештачка интелигенција без дозвола.

„Тоа претставува голема и неправедна закана за егзистенцијата на луѓето кои стојат зад тие дела и тоа не смее да се дозволи“, стоеше во изјавата. За индустријата за забава и за луѓето кои работат во неа, вештачката интелигенција и понатаму е голем проблем. Помислата дека на компаниите едноставно им е дозволено да користат нечие лице како материјал за кампања изгледа неверојатно дистописки, а на креативците постојано им виси над глава можноста да бидат заменети.