Претседателот на Соединетите Американски Држави, Доналд Трамп, очекувано, ги искористи фудбалерите (овој пат Интер од Мајами, последен пат Јувентус) како декор за својата пропаганда за надворешна политика.
Фудбалерите на Интер Мајами, предводени од легенди како Лионел Меси, Луис Суарез, Хавиер Маскерано, присуствуваа на прием во Белата куќа во петокот.
Откако, Трамп доби дрес на Интер со бројот 47 (симболизира дека Тамп е 47-от претседател на САД), кажа неколку зборови за фудбалот и како му се восхитува на Лео Меси, американскиот претседател, стоејќи пред играчите кои се шампиони на земјата што ја води, одржа говор за „тотално уништување на иранските сили“.
Првиот човек на Америка ги покани играчите на Интер како гости, се одржа церемонија каде што требаше да ја прослават првата титула од основањето на клубот. Всушност, шампионите убаво му послужија како декор.
„Американската војска, заедно со нашите прекрасни израелски партнери, продолжува целосно да го уништува непријателот, побрзо од очекуваното и на ниво што никој досега не го видел.
Секој час уништуваме сè повеќе ирански ракети и беспилотни летала, онеспособувајќи ги на начини за кои никој не веруваше дека се можни.
Штом ќе испукаат ракета, во рок од четири минути, нашите сили го уништуваат фрлачот. Тие дури и не знаат што ги погодило. Имаме најсилна армија во светот, а нивната морнарица е исчезната – 24 бродови за три дена. Тоа се многу бродови“, се пофали човекот кој очајно сака да ја освои Нобеловата награда за мир.
Додека Трамп го држеше говорот, очигледно беше дека на фудбалерите не им е пријатно.
Тој презентираше низа оправдувања за воената „кампања“ со кодно име „Епски бес“ во која, како што тврди нападнатата страна, досега се убиени 1.200 Американци.
„Навистина немавме избор. Да не ги удревме, ќе нè удреа. Тие се луди. Им ја расипавме забавата“, рече првиот човек на Америка, додавајќи дека сега Иранците се јавуваат и бараат договор:
„Им кажав дека малку доцнат и сега сакаме да се бориме повеќе отколку што сакаат тие“.
Откако во својот говор ја спомна и Куба, најде време да им се обрати на фудбалерите. Се пофали дека е единствениот претседател на САД кој успеал да го донесе Лионел Меси во Белата куќа.
Меси го доби Орденот на слободата од Џо Бајден минатата година, но не се појави на церемонијата. „Исклучително ми е чест да кажам дека ниту еден американски претседател претходно не ја имал оваа можност. Го поздравувам Лионел Меси во Белата куќа“, рече Трамп и продолжи.
„Синот ме праша – Тато, дали знаеш кој доаѓа денес? Му одговорив дека не знам, дека имам многу работа. Тој вели – Меси. А јас велам – Навистина? Тој е твој голем обожавател. Мисли дека си едноставно одлична личност.
„Мислам дека вие двајца веќе се запознавте. Тој е голем обожавател на фудбалот, но и твој голем фан и на еден господин по име Роналдо. Го имаме и Кристијано, тој е одличен. Чест ни е нам и на сите во Белата куќа да ве почестиме денес“, рече Трамп
