Снимките направени со паметните „AI“ очила на „Meta“ наводно завршуваат на увид кај вработени во странство, вклучително и во потенцијално многу приватни ситуации.meta
Според наводите од извештај на шведски медиуми, дел од видео-материјалите што корисниците ги снимаат со очилата „Meta Ray-Ban“, кои имаат вградени камери и микрофони, се испраќаат на преглед кај работници во Кенија. Овие работници, ангажирани како „data annotators“, ги прегледуваат и означуваат снимките со цел да помогнат во подобрувањето на „AI“ системите.
Некои од вработените тврдат дека виделе снимки од луѓе во многу интимни ситуации, како пресоблекување или престој во тоалет, при што постои сомнеж дека корисниците можеби не се свесни дека таквата содржина може да биде прегледувана во рамките на процесот на обработка на податоци, пренесува британскиот „Telegraph.co.uk“.
Од „Meta“ наведуваат дека очилата се дизајнирани со фокус на приватноста, дека корисниците имаат контрола врз своите податоци и дека содржината се филтрира пред да биде прегледана. Сепак, политиката за приватност на компанијата предвидува можност за автоматизиран или рачен преглед на интеракциите со „AI“ системите со цел подобрување на услугата.
Овој случај повторно го отвора прашањето колку податоците и снимките што ги генерираат „AI“ уредите навистина се приватни, особено имајќи ги предвид претходните примери во технолошката индустрија каде што корисничките интеракции биле користени за обука на системите.
