Според д-р Фуонг Во, она што луѓето често го нарекуваат бавно согорување калории или „бавен метаболизам“, всушност е метаболичка дисфункција – состојба во која телото не ја претвора ефикасно храната и кислородот во употреблива клеточна енергија.

„Основните причини често се инсулинска резистенција, хронично воспаление, хормонален дисбаланс и нарушена функција на митохондрите (фабриките за енергија во нашите клетки)“, вели д-р Во за „SheFinds“. Кога овие системи не функционираат правилно, последиците може да се манифестираат на суптилни, понекогаш изненадувачки начини. Еве неколку знаци дека вашиот метаболизам можеби не работи како што треба.

Постојан замор

Ако сме уморни без оглед на тоа колку спиеме, можно е нашите клетки да не произведуваат енергија ефикасно. „Ако митохондрите не произведуваат енергија ефикасно, нашите клетки нема да создаваат доволно АТП (енергетската валута на клетките)“, објаснува д-р Во.

Таа додава дека „инсулинската резистенција може да го спречи ’горивото‘ правилно да влезе во клетките“, што значи дека телото не ја користи енергијата ефикасно, дури и ако внесувате доволно храна.

Потешкотии со слабеење

Ако вежбате и се храните балансирано, а сепак не можете да ги намалите масните наслаги на стомакот, инсулинот може да игра клучна улога. „Хронично покаченото ниво на инсулин го блокира согорувањето масти и поттикнува акумулација на абдоминална маст, што дополнително го влошува воспалението и метаболичката дисфункција“, објаснува д-р Во.

Маснотиите во пределот на стомакот се особено поврзани со метаболичкото здравје.

Необјасниво зголемување на телесната тежина

Зголемувањето на телесната тежина без поголеми промени во животниот стил може да биде предупредувачки знак. Според д-р Во, „губењето мускулна маса, хормоните на стрес и намалената ефикасност на митохондрите го намалуваат базалниот метаболизам, што значи дека согорувате помалку калории во мирување“.

Тоа значи дека телото троши помалку енергија од порано, иако навиките остануваат исти.

Често ви е ладно

Ако често ви е ладно, тоа може да укажува на подлабок проблем. „Производството на топлина зависи од здрава хормонална сигнализација, соодветни микронутриенти и активни митохондри“, вели докторката и додава: „Намаленото производство на клеточна енергија често се манифестира како нетолеранција на студ“.

Лоша концентрација

Проблеми со фокусот, заборавност или чувство на „магла во главата“ исто така може да бидат поврзани со метаболизмот. „Мозокот е исклучително зависен од енергија. Инсулинската резистенција и митохондријалната дисфункција ја нарушуваат испораката на гориво и го зголемуваат воспалението“, појаснува д-р Во.

Силна желба за шеќер и јаглехидрати

Ако често копнеете по слатки или рафинирани јаглехидрати, можно е нивото на шеќер во крвта да ви е нестабилно. „Флуктуациите на шеќерот во крвта предизвикуваат енергетски скокови и падови, што може да доведе до желба за брзи извори на енергија“, вели д-р Во.

Попладневниот замор и вечерното грицкање може да бидат обид на телото да го надомести падот на енергијата.

Проблеми со варењето (надуеност, запек)

Метаболичкото здравје и варењето се тесно поврзани. „Метаболизмот и здравјето на цревата се тесно поврзани. Воспалението, хормоналниот дисбаланс и нарушениот микробиом ја попречуваат апсорпцијата на хранливи материи и производството на енергија“, истакнува докторката.

Лош сон или будење во текот на ноќта

Ако често се будите, особено меѓу 2 и 4 часот наутро, тоа може да биде знак за метаболичка нерамнотежа. „Инсулинската резистенција и покачениот кортизол ги нарушуваат циркадните ритми“, објаснува д-р Во.

Таа додава дека тоа може да биде и знак на перименопауза или менопауза, а лошиот сон дополнително ја влошува метаболичката контрола.

Како да го забрзате метаболизмот

Добрата вест е дека метаболизмот е многу приспособлив. „Структурираните промени во животниот стил постојано ги подобруваат гликозата, триглицеридите, крвниот притисок и обемот на струкот – често во рок од 8 до 12 недели“, објаснува д-р Во.

Таа препорачува тренинг со тежини неколку пати неделно, доволен внес на протеини, прошетка по оброк и стабилизирање на шеќерот во крвта со балансирани оброци. Подеднакво важни се сонот и управувањето со стресот.

„Сонот не е пасивен одмор. Тоа е активен, биолошки интензивен период на заздравување – особено за метаболизмот и митохондрите“, нагласува таа и предупредува: „Алкохолот не се само ’празни калории‘. Тој директно ја нарушува продукцијата на клеточна енергија, го нарушува сонот, го зголемува воспалението и го блокира согорувањето масти“.

Од перспектива на долговечноста, метаболичкото здравје се сведува на здравјето на митохондрите.

„Кога митохондрите функционираат добро, пациентите имаат стабилна енергија, подобро согорување масти, појасно размислување, поквалитетен сон и поздраво стареење“, заклучува д-р Во.