Воениот аналитичар Виктор Баранец, поранешен полковник кој воедно е и воен аналитичар за весникот „Комсомолскаја правда“, тврди дека Кремљ работи на ново оружје.
Тој го нарекол „синот на Орешник“, осмислено со цел да ги заплаши и западните сили и Киев.
Според неговите зборови, експертите наводно испитуваат дизајн со поголем корисен товар, подобрена технологија на гориво и поинакви системи за наведување.
„Навистина развиваме и тестираме проектил што ќе биде помоќен од Орешник. Ќе има подобрени параметри на разорна моќ на боевата глава“, изјавил тој.
Баранец посочил дека подобрениот систем потенцијално би можел да носи осум боеви глави наместо шест, со можност за пробивање утврдени цели до длабочина од околу 30 метри.
Руското Министерство за одбрана сè уште официјално не потврдило дека во моментов се работи на нов систем што го надминува Орешник, пренесе „Дејли Стар“.
Орешник е ракета со среден дострел (500 – 5.500 км) која може да достигне брзина до 10 маха, што ја прави речиси невозможна за пресретнување. Русија првпат ја тестирала конвенционалната верзија на оваа ракета во ноември 2024 година, погодувајќи фабрика во Украина.
Според Путин, повеќекратните боеви глави на Орешник ја прават разорна и во конвенционален напад, споредлива со нуклеарно оружје. Белоруското Министерство за одбрана наведува дека системот има дострел до 5.000 километри, додека руските медиуми тврдат дека ракетата може да стигне до воздушна база во Полска за 11 минути, а до седиштето на НАТО во Брисел за 17 минути.
Особено загрижувачки е фактот што однапред не може да се утврди дали ракетата носи нуклеарна или конвенционална боева глава, што ја зголемува стратешката неизвесност.
Русија во 2019 година го напушти договорот од советската ера кој забранувал ракети со среден дострел, овозможувајќи развој и распоредување системи како Орешник. Путин исто така предупредил дека Русија би можела да го употреби Орешник против западните сојузници на Украина доколку Киев продолжи со напади во Русија со помош на западно оружје со долг дострел.
Русија во моментов располага со само три до четири примероци од Орешник, но веќе оваа година има намера да започне сериско производство и да достигне темпо од најмалку пет ракети годишно, откри Украинската служба за надворешно разузнавање (СЗР).
Во интервју за „Укринформ“, Олег Луховски, прв заменик-шеф на СЗР, изјавил дека руското Министерство за одбрана планира значително да го забрза производството.
„Знаеме дека имаат намера да започнат сериско производство на Орешник во 2026 година и да стекнат капацитет за пет или повеќе проектили годишно“, истакнал Луховски.
Според украинските разузнавачки процени, Орешник има ограничена воена вредност и служи првенствено како геополитичка алатка за заплашување на европските сојузници на Украина. Луховски нагласил дека системот е изграден врз застарени советски технологии на Московскиот институт за термичка технологија, дека бара постојана техничка поддршка и дека се соочува со бројни дефекти.
„Борбените перформанси се сомнителни, а ракетата во моментов не е оперативно сигурна“, истакнал тој.
