„Шведска има повеќе острови од која било друга земја во светот и би сакале да ги поканиме луѓето да уживаат во она што е можеби највистинскиот облик на луксуз - мирот и тишината на природата на нивниот остров“, вели Сузан Андерсон, извршен директор на „Visit Sweden“.

Пред да започнете со планирање да го претворите вашиот приватен остров во одморалиште или да започнете некоја друга шема за заработка, постојат одредени ограничувања.

Иако островот би бил „вашиот шведски остров“, како што сугерира името на кампањата, всушност нема да го поседувате, ниту ќе можете да го преименувате во ваша чест. Наместо тоа, ќе бидете официјален чувар на островот (со диплома како доказ) со едногодишно право да го користите.

Во текот на овој период, ќе можете да кампувате, да пливате, да покануват пријатели и да поминувате време во природа, под услов да покажете внимание кон локалните животински видови и животната средина, пишува „Euronews“.

Бидејќи Шведска има законски загарантирано јавно право на островот, и други луѓе можат да го посетат или да поминат низ него во тој период.

Како да освоите приватен остров

Пет приватни острови се во игра - Медбодан, Флисан, Сторбергет, Тјувхолмен и Марстен, а наградата вклучува повратен билет за Шведска за две лица.

За жал, таа награда не вклучува превоз до „прекрасно оддалечените“ острови што може да ги користите, па затоа победниците треба да бидат подготвени да изнајмат кајак, даска за стоечко веслање или чамец за време на патувањето.

За да учествувате во натпреварот, треба да испратите видео во кое објаснувате зошто го заслужувате островот, кое трае помалку од една минута. Можете да ги зголемите вашите шанси со споделување на видеото на социјалните мрежи со хаштагот #YourSwedishIsland.

Апликациите мора да бидат испратени пред 17 април 2026 година, а жирито ќе ги избере најкреативните апликации и ќе ги објави победниците во мај оваа година.

Конкурсот е отворен за сите меѓународни патници над 18 години, освен милијардерите. Причината за ова е тоа што „Visit Sweden“ „сака да го редефинира луксузот како едноставност, тишина и слобода во природата, а не материјален вишок“.