„Болка што го пече мозокот“

Патникот, кој летал од Сан Антонио кон Чикаго порано оваа недела, опишал како за само неколку секунди преминал од „целосно нормална состојба“ во состојба на „болка што го пече мозокот“.

„Чувството беше како очите да ќе ми излезат, а тапанчето ќе ми пукне“, се присетил тој. Набргу сфатил дека не е единствениот што ја доживува агонијата. Кога погледнал низ кабината, видел „и други патници како се држат за главата и збунето гледаат наоколу“, стои во објавата.

UA1332 from SAT to ORD depressurized today and it was AWFUL
byu/just_shit_my_pants inunitedairlines

Загрижен поради ненадејната болка, ја повикал стјуардесата и со гестикулации кон главата се обидел да објасни што се случува. Членката на екипажот тогаш потврдила дека авионот останал без „притисок во кабината“.

Одлуката на капетанот спречила катастрофа

За да спречи понатамошна ескалација, капетанот донел одлука авионот да се спушти на пониска висина, со што била избегната потребата од активирање на маските со кислород. Летот потоа бил пренасочен кон Меѓународниот аеродром „Џорџ Буш“ во Хјустон, каде патниците се префрлиле во друг авион и го продолжиле патувањето кон крајната дестинација.

Иако катастрофата била избегната, патникот тврди дека и понатаму ги чувствува последиците од инцидентот и напоменува дека слухот сè уште „не му се вратил целосно“.

„Сакам да летам со ‘United Airlines’ и имам статус кај нив, но ова беше застрашувачко и исклучително болно искуство“, напишал тој. „United“ му понудил како компензација 4000 километри бесплатни летови, но тој тоа го смета за недоволно со оглед на „апсолутно ужасното искуство“ и трајните симптоми.

Што е декомпресија и зошто е опасна?

Патникот имал среќа што исходот не бил полош, со оглед на потенцијално катастрофалните последици од декомпресијата. Авионите што летаат на височини над околу 3000 метри мора да имаат кабина под притисок за патниците да имаат доволно кислород за нормално функционирање.

Кога притисокот во кабината нагло ќе падне, најчесто поради оштетување што ја нарушува херметичноста на кабината, автоматски паѓаат маските со кислород. Тие обезбедуваат доволно кислород додека пилотите не го спуштат авионот на висина од 3000 метри или пониско, каде воздухот е доволно густ за дишење.

Бидејќи човечкото тело е приспособено да функционира на височини блиску до нивото на морето, наглиот пад на притисокот може да предизвика низа симптоми. Тоа вклучува пукање на капиларите во носот и ушите, па дури и пукање на тапанчето поради дејството врз Евстахиевата туба, која ја одржува рамнотежата на притисокот меѓу атмосферата и внатрешното уво.

Најголемата опасност – хипоксија

Веројатно најопасната последица од декомпресијата, и причината за постоењето на маските со кислород, е хипоксијата – состојба опасна по живот што настанува кога ткивата во телото не добиваат доволно кислород. Оваа компликација може да настапи многу брзо и да влијае врз способноста за донесување одлуки.

„На висина од околу 5500 метри човекот ја губи способноста да презема корективни и заштитни дејства веќе по 20 до 30 минути, а на околу 6100 метри по само 5 до 12 минути, по што набргу може да следи и губење на свеста“, предупредува Американската федерална администрација за воздухопловство (FAA). Со оглед на тоа што повеќето комерцијални авиони летаат на висина од околу 10.700 метри, времето за реакција тогаш се сведува на само 30 до 60 секунди.

Во текот на тоа кратко време, погодените лица можат да доживеат „драстичен пад во расудувањето, меморијата, будноста, координацијата и способноста за пресметување“, наведува FAA. Поради тоа, хипоксијата може да биде катастрофална ако настапи пред пилотите да сфатат што се случува.

За среќа, декомпресијата во повеќето случаи се преживува. Во 2024 година, со херојска акција на екипажот на летот на „Alaska Airlines“ 1282, беа спасени животите на сите патници откако дел од трупот на авионот се одвоил на висина од 4000 метри, оставајќи огромна дупка низ која од кабината биле исфрлени предмети.