Коцка чоколадо по оброк за многумина е мал ритуал што го подобрува расположението. Сепак, покрај уживањето, темното чоколадо може да има и реални здравствени придобивки, особено кога станува збор за стресот и менталната благосостојба.
Истражувањата покажуваат дека редовната консумација на темно чоколадо може да го намали нивото на хормоните на стрес. Во една студија, 30 испитаници во период од две недели секојдневно консумирале по 40 грама темно чоколадо.
Резултатите покажале дека кај лицата со поизразена анксиозност дошло до намалување на кортизолот и катехоламините – хормони поврзани со стресот.
Покрај тоа, темното чоколадо позитивно влијае врз метаболизмот и здравјето на цревната микробиота. Експертите наведуваат дека ваквиот ефект може да придонесе за подобра регулација на стресот и за општото здравје на организмот.
Бидејќи стресот го забрзува стареењето на кожата и го намалува производството на колаген, неговото намалување може позитивно да се одрази и на изгледот на кожата.
Важно е да се внимава при изборот на чоколадо. Се препорачува квалитетно темно чоколадо со висок удел на какао, без додаден шеќер и вештачки состојки. Органското какао и природните засладувачи, како стевијата, се подобра опција од индустриските производи богати со рафиниран шеќер.
Како алтернатива, стручњаците советуваат и консумација на топло чоколадо без шеќер, кое ги задржува благотворните својства на какаото.
