Добрата хидратација е клучна за здравјето на целиот организам, но и за правилното функционирање на дигестивниот систем. Течностите ја помагаат дигестијата, ја одржуваат цревната слузница здрава и ја поддржуваат рамнотежата на цревните бактерии кои влијаат врз варењето, воспаленијата, па дури и расположението. Дури и блага дехидратација може да ја забави дигестијата и да доведе до запек, надуеност и непријатност, додека долгорочно нискиот внес на течности може негативно да влијае врз разновидноста на цревниот микробиом.
Освен водата, одредени напитоци можат дополнително да помогнат за варењето, а гастроентеролозите како особено добар избор го издвојуваат чајот од нане. Станува збор за билен чај без кофеин, кој се подготвува од листови од нане и е познат по своето смирувачко дејство врз дигестивниот систем.
Гастроентерологот Мухамед Ф. Хокхар вели дека пиењето топол чај од нане ја поттикнува хидратацијата и подвижноста на цревата, како и дека помага при грчеви во желудникот. „Чајот од нане има антиспазмодични својства, што е корисно кај синдромот на иритабилно црево (IBS) и воспалителните болести на цревата (IBD)“, објаснува тој за „Parade“.
Чајот придонесува и за подобро варење
Експертите истакнуваат дека поголемиот дел од придобивките од чајот од нане се поврзуваат со маслото од нане, иако неговата концентрација во чајот е значително пониска отколку во самото масло.
Д-р Џамил Алексис, гастроентеролог од „Stamford Health“, нагласува дека и покрај тоа, чајот сè уште може да помогне за варењето, додека д-р Џејмс Џ. Ли од болницата „Providence St. Joseph“ наведува дека нането има противвоспалително дејство, ги опушта мазните мускули и ја намалува чувствителноста на дигестивниот систем.
„Тоа вклучува противвоспалително дејство, опуштање на мазните мускули и намалување на висцералната болка и чувствителност преку блокада на калциумските канали“, вели тој, додавајќи дека ефектите ги опфаќаат хранопроводот, желудникот, тенкото и дебелото црево, како и жолчното ќесе. Д-р Алексис истакнува дека чајот е особено корисен за лицата со IBS и нарушувања на оската црево – мозок.
Клучна е умереноста
Според нутриционистката д-р Кезија Џој, придобивките од чајот од нане повеќе се однесуваат на ублажување на симптомите отколку на промени во цревните бактерии. „Придобивките од пиењето чај од нане повеќе се поврзани со олеснување на симптомите отколку со промена на цревната флора“, вели таа.
Експертите предупредуваат дека чајот треба да се пие умерено, една до две шолји дневно, бидејќи поголеми количини можат да го влошат рефлуксот. „Вкупните здравствени придобивки од редовниот, умерен внес обично се поголеми отколку кај големи количини“, додава д-р Џој.
Нутриционистката Стефани Дан истакнува и дека најдобро е чајот да се пие без додатоци: „Предноста на чистиот чај од нане е тоа што не содржи шеќер или други состојки кои можат да имаат негативни ефекти.“
