Она што започнало како рутинско следење на дивите животни се претворило во приказна за долгорочни резултати за зачувување на животната средина.

Забележани ретки сцени

Благодарение на современите методи за набљудување, истражувачите денес можат подетално од кога и да е да ја следат состојбата на екосистемот, движењето на животните и успешноста на програмите за обнова на живеалиштата.

Таквите податоци не ѝ служат само на науката туку и на локалните заедници кои имаат длабок увид во тоа колку природното опкружување е здраво и стабилно.

Во последно време, камерите поставени во природата ширум светот забележале исклучително ретки сцени – од мечки во запоставените делови на канадски Јукон до леопард во Националниот парк на западното крајбрежје на Јужна Африка.

Овие кадри потврдуваат колку таквите уреди станале клучен алат во современата заштита на природата.

Неодамна пристигнала веста која особено одекнала во североисточен Охајо. Камерите поставени во резерватот за природа Кливленд Метропаркс, забележале присуство на диво животно кое во тоа подрачје не било видено повеќе од еден век.

Со понатамошна проверка било потврдено дека станува збор за куна риболовец (Martes pennant), пренесува „The Cool Down“.

Клучна улога во следење на екосистемот

„Ова е исклучително возбудливо“, било наведено во објавата на резерватот на Инстаграм каде се истакнува значењето на ова откритие, како за природната историја на регионот, така и за повеќедецениските напори за чување на животната средина.

Куната риболовец исчезнала од овој дел на Охајо кон средината на 19 век, првенствено поради интензивниот лов и губење на живеалиштето. Враќањето се толкува како јасен знак за успешна обнова на природата и паметното управување со локалниот екосистем.

Експертите истакнуваат дека камерите во природата играат клучна улога во следење на здравјето на популацијата, нивните миграции и закрепнување на загрозените видови.

Секоја забележана фотографија или видео придонесува во поширокото разбирање на начинот на којшто автохтоните видови се враќаат на своето некогашно живеалиште.

„Ова е огромна работа“

За резерватот на природа Кливленд Метропаркс и Одделението за диви животни на Охајо, појавувањето на „заборавените“ видови претставува потсетник дека зачувувањето на природата функционира.

„Феноменално“, изјавил еден од локалните жители кога слушнал за новоста.

Друг додал: „Ова е огромна работа! Напорите на државите во областа на зачувување на природата и природното закрепнување навистина се восхитувачки“.