Сем Алтман и Џони Ајв привлекоа големо внимание од јавноста кога најавија соработка и развој на целосно нов уред базиран на вештачка интелигенција. За каков уред станува збор сè уште е мистерија, но кон крајот на минатата година дознавме дека ќе биде „едноставен, убав и разигран“ уред, со „минималистичка естетика“. Освен овие општи епитети, кои всушност не откриваат многу за самиот производ, Алтман тогаш изјави и дека иницијалниот хардвер веќе е завршен.

Оваа недела излегоа нови детали за овој, како што некои го нарекуваат, геџет на иднината. Сепак, не станува збор за официјални информации, туку за гласини што доаѓаат од сигурни извори (Smart Pikachu, кој го следи пазарот на синџири за набавка), а ги пренесе „Gizmodo“.

Кодното име е „Sweetpea“

Според овие информации, првиот уред што ќе произлезе од соработката меѓу извршниот директор на „OpenAI“ и еден од најпознатите дизајнери ќе биде посебен аудио уред со уникатен и досега невиден дизајн. Тој дизајн, судејќи според фотографиите што се појавија на социјалната мрежа „X“, ќе наликува на јајце, во чија внатрешност ќе има уште два дополнителни геџети/слушалки во форма на пилула, кои се поставуваат зад увото – иако од фотографиите не е јасно како точно ќе се закачуваат или прицврстуваат. Кодното име на уредот е „Sweetpea“, а со него би требало да се управува со глас, при што главниот интерфејс, секако, ќе биде „ChatGPT“.

Претходно се зборуваше дека станува збор за уред кој првенствено ќе следи и ќе слуша сè што се случува околу корисникот, а со текот на времето ќе се приспособува на него, на неговиот начин на живот и ќе реагира контекстуално, во зависност од ситуацијата. Но, порано имаше информации и дека би требало да има повеќе камери и микрофони, за да може и да „гледа“ што се случува во околината и, според тоа, да реагира на просторот и ситуацијата.

Геџет каков што никој не би очекувал

Доколку новите гласини се точни и станува збор за минијатурен уред што се носи зад увото, тешко е да се очекува дека ќе има камери. Сепак, Алтман и Ајв можеби навистина подготвуваат и ваков уред со камери, бидејќи, според наводите, не се фокусираат само на еден геџет. Имено, наводно на „Foxconn“ му било кажано да се подготви за производство на дури пет уреди до последниот квартал од 2028 година. Првиот – најверојатно токму овој што се носи зад увото – се очекува уште овој септември, доколку не дојде до проблеми во развојот и производството.

Новите гласини споменуваат уште два потенцијални уреди – еден „домашен уред“ (што би можело да биде некаква верзија на паметен звучник или слично), а другиот е геџет каков што речиси никој не би го очекувал – AI пенкало.

Станува збор, значи, за гласини кои веројатно се базирани на планови што, секако, може да се променат, а официјални информации за тоа што точно подготвуваат Ајв и Алтман не треба да се очекуваат сè до официјалното претставување на самиот уред.