Се очекува во следните пет години уделот на патувањата со воз да сочинува 40 отсто од сите патувања на подрачјето на Европа. Железничкиот сообраќај расте, а со тоа доаѓа и отворање нови линии и воведување возови со сè подобра понуда за патниците. Ова се некои од најочекуваните линии во 2026 година.

Нова директна дневна линија меѓу Прага и Копенхаген, со застанување во Берлин

Железничката поврзаност меѓу европските метрополи станува сè подобра. Сè попопуларни се ноќните возови со вагони за спиење, со кои патниците одморени и наспани пристигнуваат на дестинацијата, а тематските возови заземаат сè поголем удел во секојдневниот сообраќај. Од 1 мај започнува нова директна дневна линија меѓу Прага и Копенхаген, која ќе сообраќа преку Берлин.

Возот Прага – Копенхаген ќе сообраќа во текот на целата година во двата правци. Патувањето меѓу Берлин и Копенхаген ќе трае околу седум часа, додека релацијата Копенхаген – Прага ќе трае приближно 11 часа. Покрај тоа, постојната сезонска ноќна линија Хамбург – Копенхаген во текот на летото ќе се продолжи до Прага, пишува „Euronews“.

На патниците ќе им бидат на располагање ресторан, „Wi-Fi“, простор за велосипеди, лифтови за лица со попреченост, но и кино за деца. Посебност се и прозорците кои го подобруваат мобилниот сигнал за време на возењето. На линијата ќе сообраќаат модерни возови „ComfortJet“ со 555 седечки места, а планирани се застанувања во поголеми градови како Дрезден и Хамбург.

Линија долга 1.400 километри ќе ги поврзува Швајцарија и Шведска

Се враќа и популарната ноќна линија меѓу Париз и Берлин. Таа била укината бидејќи била повлечена финансиската поддршка од француската Влада, но сега оваа рута ја презела компанијата „European Sleeper“ и повторно ја пушта во сообраќај на 26 март.

Исто така во април започнува да сообраќа нова ноќна линија која ќе ги поврзува Базел со Копенхаген и Малме. Линијата ќе биде долга 1.400 километри и ќе ги поврзува некои од најубавите делови на Европа. Иако проектот сè уште го чека конечното одобрување за државно финансирање, билетите веќе се во продажба и првото поаѓање е планирано за 15 април. Возот ќе сообраќа трипати неделно во двата правци.

Со воз од Лондон до шкотскиот град преполн со историја

Нова линија се воведува и во Обединетото Кралство. Нискобуџетниот железнички превозник „Lumo“ стартува линија меѓу лондонската станица „Euston“ и градот Стерлинг во Шкотска, сместен на околу еден час возење северно од Единбург.

Стерлинг е познат по импресивниот средновековен замок на вулканска карпа, како и по споменикот посветен на шкотскиот национален херој Вилијам Волас. Линијата треба да започне да функционира во средина на 2026 година, со попатни застанувања во Локерби, Карлајл, Престон и Нанитон.