Иако досега посетила 167 земји во рамки на својата мисија, Клои, како што наведува, ќе ги избегнува Авганистан, Демократска Република Конго и Судан, „од почит“ кон локалното население кое живее во „страшни“ услови, пишува „Daily Mail“.

Доживувајќи ги убавините од перуанската Амазонија до Антарктикот, Клои е свесна колку е среќна, но верува дека е подеднакво важно да се истражат и „тешкотиите, тагата и реалноста на животот“ во земјите што се сметаат за небезбедни.

Во неодамнешно видео на својот Инстаграм профил, таа објасни зошто трите споменати земји нема да бидат на нејзината листа за повторна посета.

Земји што ги избегнува од етички причини

Иако Авганистан го опиша како „прекрасна“ земја во која имала пријатно искуство, Клои смета дека локалното население страда под власта на талибанците, кои се вратија на власт во 2021 година.

„Речиси е непочитување од моја страна да ги злоупотребувам слободите што им се даваат на странците, но не и на локалното население. Мислам дека ова не е дестинација за секојдневниот патник“, додаде таа.

Следна на листата е Демократска Република Конго. Иако, како што истакна, „навистина уживала“ во патувањето низ оваа централноафриканска земја, не би се вратила поради опасностите со кои се соочуваат и локалното население и туристите.

Земјата се соочува со тешка хуманитарна криза, со милиони раселени лица и зголемен ризик од болести поради ескалацијата на конфликтите во источните провинции, каде што бунтовничката група М23 зазеде клучни градови.

Третата и последна дестинација што Клои ја избегнува е Судан. Таа го опиша како „неверојатна“ земја која се соочува со „сериозна катастрофа“ на граѓанска војна, за која тврди дека е „поддржана од странски сили“.

„Она што им се случува на жените секојдневно е ужасно, а единственото подрачје што туристите воопшто смеат да се обидат да го посетат е Порт Судан, и тоа најчесто со хуманитарна виза“, објасни таа.

Патничката нагласи дека сите три земји се „неверојатни“, но одлучила да ги избегнува „од почит кон луѓето што живеат таму“ и ги повика и другите да го направат истото.

Измешани реакции од следбениците

Нејзината објава предизвика лавина коментари. Додека некои се согласија со нејзиниот став, други укажаа на нејзината привилегираност или тврдеа дека присуството на странски посетители всушност им помага на локалните заедници.

„Како Авганистанец кој исто така бил таму многу пати, ја разбирам вашата перспектива, но не се согласувам. Ситуацијата во Авганистан е полоша кога странците не доаѓаат во посета отколку кога доаѓаат, бидејќи тогаш нивните ставови поддржуваат уште поголем масакр во веќе разорената земја“, напиша еден корисник.

Друг бил поостар: „Патувавте во Авганистан кога авганистанските жени не можат слободно да патуваат и да ја истражуваат сопствената земја. Ве молам, немојте да се преправате дека не сте знаеле дека талибанците ве користат како своја ПР-машина“.

„Изненаден сум што воопшто сте биле таму. Но мислам дека тоа е здрав разум“, додал трет.