Објавен е првиот трејлер за новата научнофантастична хорор-серија „The Beauty“, во која покрај Ештон Качер се појавува и Бела Хадид, а чија премиера е закажана за 21 јануари 2026 година на каналот „FX“ и на платформата „Hulu“.
Дејството на серијата следи застрашувачка приказна за револуционерна инјекција наречена „The Beauty“, која ветува физичко совршенство, но со катастрофални последици. Ештон Качер го толкува ликот на мистериозен технолошки милијардер чиј производ е токму тој суперлек – но она што требало да биде третман за убавина се претвора во пандемија на смртоносен вирус.
Во трејлерот се гледа како ликот на Качер, опуштен на јахта, го фали својот производ со зборовите: „Јас сум најдобрата реклама за најпопуларниот нов суперлек што ве прави убави без никаков напор“.
Меѓутоа, проблемите започнуваат кога луѓето кои ја примаат инјекцијата почнуваат да умираат и да мутираат – што вклучува и сцени од светот на модата. Во серијата се појавуваат и агенти на ФБИ кои го истражуваат избувнувањето на оваа мистериозна болест.
Во главните улоги, покрај Ештон Качер, се појавуваат Еван Питерс, Ребека Хол, Ентони Рамос и Џереми Поуп, додека меѓу гостинските ѕвезди се Бела Хадид, Изабела Роселини, Бен Плат и други.
Премиерата на серијата „The Beauty“ е закажана за 21 јануари 2026 година на каналот „FX“ и на стриминг-платформата „Hulu“, со меѓународна дистрибуција на „Disney+“ од 22 јануари во одредени земји.
