Суперфит баба сака да докаже дека годините се само број, па затоа се пријавува на бодибилдинг натпревари. Лесли Максвел често ги шокира луѓето кога ќе ги открие своите вистински години, а причината е едноставна: има подобри стомачни мускули од повеќето луѓе кои се двојно помлади од неа …
Со цел да им покаже на другите дека фитнес целите можат да се постигнат и во подоцнежните години од животот, оваа лична тренерка влегува во натпревар во обликување на телото.
Натпреварот „All Natural Figure Competitions“ е закажан за април 2026 година, каде што таа се надева дека ќе ја надмине конкуренцијата и воедно ќе инспирира други луѓе.
Лесли, која доаѓа од Мелбурн, Австралија, вели дека никогаш не замислувала дека на овие години ќе се подготвува за ваков предизвик.
„Да ми кажеше некој дека сега ќе градам глутеуси за натпревар, веројатно ќе се насмеев. Но еве ме, повторно во режим на подготовки за натпревар“, изјави таа.
Таа објасни и како изгледа нејзината рутина за вежбање.
„Мојата рутина се состои од тренирање на долниот дел од телото на секој тренинг, што значи четири дена неделно. Ги правам и моите препознатливи „наизменични серии“, што значи вежба за долниот дел од телото, проследена со вежба за горниот дел од телото“, вели Лесли.
„Ќе биде забавно, но и предизвикувачко патување. Сакам да ги поместувам сопствените граници и да видам што може да се постигне. Не само на лично ниво, туку се надевам дека ќе инспирирам и други да сфатат дека годините се само број“, додаде таа.
Иако Лесли и претходно учествувала на натпревари, истакнува дека секој од нив е различен и дека стандардите со текот на времето се менуваат.
„Во текот на последната деценија, идеалната телесна градба на сцената се промени, а глутеусите станаа главен фокус. Затоа судиите сега бараат пополнет и поурамнотежен долен дел од телото“, објасни таа.
“Исто како што се развива модата, така се развиваат и стандардите на натпреварите, а јас сакам да видам какви промени можам да направам во тие области“, додаде Лесли.
Пред неа има уште многу подготовки пред големиот ден, кој започнува во раните утрински часови и трае со часови, пишува „Mirror“.
„Сè започнува рано: пријавување, затемнување на кожата, фризура, шминка и вежбање на позирање за да ги истакнеме мускулите. Навистина се трудам да останам присутна во моментот и во својот свет, за ништо да не ме одвлече“, вели таа и додава:
“Кога сме еднаш на сцената, нè оценуваат според рамнотежата, симетријата, позирањето, мускулниот тонус и целокупниот изглед. Тоа е долг и интензивен, но неверојатно исполнувачки ден.
И нејзината исхрана е строго контролирана.
„Кардио тренинзите ги сведувам на минимум сè додека не се приближи натпреварот. И секогаш јадам чиста, хранлива храна со доволно протеини и масти. Најчесто живеам на јајца и стек, со едно парче овошје дневно. Некои би рекле дека е тешко, но јас го сакам начинот на кој се чувствувам поради тоа“, објасни таа.
По завршувањето на натпреварот следуваат нови кругови.
„По овој натпревар, продолжуваме на државното првенство, каде што се натпреваруваат победниците од секоја држава. Оттаму се избираат најдобрите натпреварувачи кои ќе ја претставуваат својата земја на светските првенства. Тоа е навистина возбудливо време и на патот запознав толку многу неверојатни луѓе“, изјави Лесли.
Таа се надева дека ќе ги охрабри и другите луѓе на нејзина возраст да започнат со фитнес и подобро да се грижат за своето тело.
„Неверојатно е што можеме да го промениме обликот и здравјето на нашето тело, да ги обликуваме глутеусите, да ги затегнеме рацете и струкот, без разлика на годините. Би сакала повеќе луѓе да бидат свесни за моќта на она што го јадеме и на ефикасниот тренинг. Луѓето знаат дека подобро е да не ми велат да забавам. Ова е она што ме прави силна, среќна и инспирирана“, заклучи тренерката, која има 65 години.
