Иако откажувањето од работата често не е опција, постојат стратегии што можат да помогнат во зачувување на здравјето и подобрување на квалитетот на животот.

Добриот сон како приоритет

Најголемиот предизвик на ноќната работа е нарушениот распоред на спиење. Британскиот национален регулатор за здравје и безбедност при работа („HSE“) истакнува дека доследниот распоред на легнување и будење помага во „тренирање“ на биолошкиот часовник. „Sleep Foundation“ советува контрола на изложеноста на светлина со цел да се симулираат ноќни услови и да се поттикне подлабок и поквалитетен сон.

Стратешки планирајте ги оброците

Ноќната работа може да го наруши и распоредот на исхраната, што влијае врз контролата на нивото на гликоза во крвта. Студија на американскиот Национален институт за здравје („NIH“) покажа дека ограничувањето на оброците на дневните часови може да ги намали наглите скокови на шеќерот во крвта и со тоа да го намали ризикот од дијабетес. Се препорачува најобилниот оброк да се консумира преку ден, додека ноќе треба да се избегнува тешка храна и да се избираат помали, полесни закуски.

Групирајте ги ноќните смени

Експертите од Универзитетот „St. Augustine for Health Sciences“ советуваат ноќните смени да се групираат секогаш кога тоа е можно. Тие препорачуваат и распоредот на спиење адаптиран на ноќната работа да се почитува и за време на слободните денови. На тој начин телото полесно се навикнува на стабилен ритам и не мора постојано да се приспособува на промени.

Останете физички активни

Работата ноќе често води кон седечки начин на живот и замор, што негативно влијае врз метаболизмот, расположението и здравјето на срцето. Редовната физичка активност, како кратки прошетки или вежби за истегнување за време на паузите, може да ја подобри циркулацијата. Дополнително, клучна е и хидратацијата – доволниот внес на вода ја поддржува концентрацијата, варењето и нивото на енергија. Обидете се да го ограничите внесот на кофеин пред крајот на смената за да не го нарушите сонот.

Не го занемарувајте социјалниот живот

Ноќните смени можат да бидат изолирачки и стресни, бидејќи вашиот распоред често не се совпаѓа со социјалните и семејните обврски. Менталното здравје директно влијае врз квалитетот на сонот и општата физичка состојба. Затоа е важно да се одржува контакт со пријателите и семејството во слободното време. Техники за релаксација, како медитација, длабоко дишење или смирувачки рутини пред спиење, исто така можат да помогнат во намалување на стресот.