„Лукоил“ би можел да добие необичен газда: За купување на рускиот гигант заинтересиран поранешниот сопственик на „Pornhub“

Австрискиот бизнисмен Бернд Бергмаир, поранешен мнозински сопственик на компании насочени кон забава за возрасни, вклучувајќи ја веб-страницата „Pornhub“, се обратил до Министерството за финансии на САД во врска со купувањето на меѓународниот имот на санкционираниот руски нафтен гигант „Лукоил“.

САД воведоа санкции на „Лукоил“, најголемиот руски приватен производител на нафта, како дел од напорите да се изврши притисок врз Москва да стави крај на војната во Украина.

Бернд Бергмаир

Санкциите го принудија „Лукоил“ да ја објави продажбата на меѓународниот имот, а повеќе купувачи се обратиле до американските власти за дозвола да започнат преговори со „Лукоил“, вклучувајќи ги и нафтените компании „Exxon Mobil“ и „Chevron“.

Бергмаир преку адвокати одбил да прецизира за кои средства е заинтересиран, дали веќе контактирал со „Лукоил“ или дали е дел од инвестициски конзорциум.

„Очигледно, ‘Lukoil International’ би била одлична инвестиција и секој би имал среќа да има привилегија да го поседува тој имот. Сам по себе, не коментирам потенцијални инвестиции“, изјавил Бергмаир за „Reuters“.

Интересот за „Лукоил“ се зголемил откако Министерството за финансии на САД минатиот месец им одобри на компаниите да започнат преговори со „Лукоил“. Министерството за финансии одобри преговори до 13 декември и мора да го одобри секој договор.

Бергмаир, кој работел за „Goldman Sachs“ во Њујорк како инвестициски банкар во 1990-тите пред да се посвети на приватни инвестиции, бил мнозински сопственик на „MindGeek“ – компанија со седиште во Луксембург која поседува веб-страници како „Pornhub“, „RedTube“ и „YouPorn“ – сè додека не била продадена во 2023 година на канадска приватна инвестициска компанија за непозната сума.

На листата на најбогати лица во Британија, објавена од „The Sunday Times Rich List“ во 2021 година, неговото богатство е проценето на најмалку 1,2 милијарди фунти.