Според „Политико“ и германскиот весник „Ди Велт“, односите меѓу двете најмоќни жени во администрацијата во Брисел влегоа во фаза на отворен натпревар, обележана со конфликти за влијание, кадровски одлуки и внатрешно позиционирање во институциите на ЕУ.

Калас без поддршка, вработените застанаа на страната на Фон дер Лајен

Како што пишува американски „Политико“, веќе затегнатите односи меѓу двете високи функционерки дополнително се влошија кога Калас се обиде да го позиционира својот близок советник Мартин Селмајр на една од клучните позиции во дипломатскиот апарат на Унијата. Селмајр, поранешниот шеф на кабинетот на Европската комисија и долгогодишен критичар на Урсула фон дер Лајен, се сметаше за човек што значително ќе го зајакне влијанието на естонската политичарка во рамките на структурите во Брисел.

Сепак, оваа намера наиде на жесток отпор и во кабинетот на претседателот на Комисијата и во неколку европски престолнини, кои не сакаа да ја поддржат Калас во нејзината кадровска офанзива. Според „Ди Велт“, ниедна голема земја членка не застана на страната на високата претставничка на ЕУ, што доведе до јасен политички пораз за Калас и драматично слабеење на нејзината позиција.

Иронијата на ситуацијата е што дури и вработените во дипломатската служба на ЕУ – телото формално подредено на Калас – ја поддржаа Урсула фон дер Лајен, што во Брисел се толкува како знак на длабока поделба и недоверба во самата европска администрација.

Истрага за корупција: Уапсена Федерика Могерини

Дополнителна тежина на внатрешните превирања во ЕУ донесе големата истрага за злоупотреба на јавни средства, која ја спроведуваат белгиските власти. На 2 декември белгиската федерална полиција спроведе координирани претреси на неколку локации во Брисел и во Бриж, вклучувајќи приватни резиденции на осомничените, седиштето на Европската служба за надворешна акција (ЕЕАС), Колеџот на Европа во Бриж. Во оваа ситуација беа уапсени две познати личности од врвот на поранешната бриселска администрација: Федерика Могерини, поранешна висока претставничка на ЕУ за надворешна политика и безбедност и актуелен директор на Колеџот на Европа; Стефан Санин, поранешен генерален секретар на Европската служба за надворешни работи.

Сите се обвинети за учество во шема на корупција, измама и злоупотреба на јавни средства во рамките на проекти финансирани од фондовите на Европската Унија. Запленета е обемна документација, која, според очекувањата на истражителите, ќе биде клучна за утврдување на обемот на мрежата што долго време функционира во институциите на Унијата.

Комбинацијата од политички конфликт на највисоко ниво и корупциски скандал во самото срце на европската дипломатија иницира прашања за стабилноста и за кредибилитетот на институциите на Европската Унија, според написите во медиумите. Во Брисел веќе се зборува за криза на довербата во управувањето и за борба меѓу клановите, што го тресе врвот на европската администрација, а членките на ЕУ сè повеќе се прашуваат колку внатрешните поделби ги загрозиле кохезијата и стратешката ориентација на Унијата во ерата на големи геополитички предизвици.

Во меѓувреме, односите меѓу Урсула фон дер Лајен и Каја Калас продолжуваат да се влошуваат, а западните медиуми проценуваат дека овој конфликт би можел да има долгорочни последици врз целокупната архитектура на надворешната политика на Европската Унија.