Трамп му рече на уредничкиот одбор дека е „паметен“, а дека тие „не се паметни“, обвинувајќи ги новинарите дека неправедно известуваат за неговото здравје и издржливост. „Вие сте луди“, додаде тој, објави Си-ен-ен.

Но, во текот на следниот час и половина, Трамп се бореше да ја покаже истата јасност и енергија со која претходно се фалеше. Се чинеше дека води долга и често губитничка битка со попладневниот замор. Дури и додека членовите на неговиот кабинет држеа пофални зборови во негова чест – една од неговите омилени активности – претседателот постојано ги затвораше очите.

Само 15 минути по неговиот остар напад врз медиумите, Трамп се мачеше да остане буден додека министерот за трговија Хауард Лутник го фалеше за неговите трговски војни.

На Трамп му се натежнаа очите додека ги слушаше министерот за домување и урбан развој Скот Тарнер и министерката за земјоделство Брук Ролинс. Борбата стана уште поочигледна за време на говорите на министерот за финансии Скот Бесент, министерката за труд Лори Чавез-Деремер и администраторот на Агенцијата за заштита на животната средина Ли Зелдин.

Додека министерката за образование Линда Мекмахон и министерот за здравство Роберт Ф. Кенеди Џуниор се јавија на збор, Трамп изгледаше речиси неподвижен, држејќи ги очите затворени 10 до 15 секунди пред одеднаш да ги отвори или да кимне со главата.

Слична сцена беше повторена за време на говорот на државниот секретар Марко Рубио, во кој беа пофалени напорите на Трамп за прекин на војните. Овој пат, дремењето на Трамп беше уште позабележително бидејќи седеше веднаш до Рубио, а камерите беа фокусирани на двајцата. На крајот од својот монолог, Рубио се пошегува, и ако Трамп ја слушна шегата, не изреагира никако.

Бела куќа: „Тој внимателно слушаше“

Кога беше замолена да коментира за настанот, портпаролката на Белата куќа, Каролина Ливит, рече дека Трамп „внимателно слушал и го водеше целиот маратонски состанок на кабинетот“. Таа го пофали за одржувањето на девет состаноци на кабинетот оваа година и за неговиот „извонреден“ одговор за време на сесијата со прашања и одговори, кога ги нападна демократите и сомалиските имигранти.

„На сите овие историски состаноци, претседателот и неговиот неверојатен тим го истакнаа обемниот список на достигнувања што ги направија во име на американскиот народ за повторно да ја направат Америка голема“, рече Ливит.