„Phantom MK1“, изработен од челик и пластика и опремен со осум камери во „главата“, е замислен како машина што може да ги имитира – но и да ги надмине – човечките способности. „Првиот чекор е роботот да работи сè што работи човек“, вели Санкает Патак, извршен директор и коосновач на „Foundation“. „Крајната цел? Да ги испраќаме на Месечината и Марс, каде ќе градат, одржуваат и штитат инфраструктура на места каде што човекот тешко може да опстане.“

За да ја постигне таа автономија, „Phantom“ се обучува за низа воени и индустриски задачи, како што се одржување и полнење авиони, пробивање препреки и логистика во борбени зони. Според Патак, токму тие „одбранбени use-case сценарија“ ја создаваат основата за долгорочниот план хуманоидни роботи еден ден да градат колонии во вселената.

Американското Министерство за одбрана за „Newsweek“ изјави дека автономните системи се „иднината на бојното поле“ – од дронови до роботи кои ја зголемуваат ефикасноста и го намалуваат ризикот за човечки животи.

Од банкрот до амбиција вредна 10 милијарди долари

Патак, поранешен шеф на пропаднатиот финтек-стартап „Synapse“, ја основал „Foundation“ минатата година заедно со Арџун Сети од „Tribe Capital“ и поранешниот американски маринец Мајк ЛеБланк. Денес, тој активно ја застапува идејата дека роботи како „Phantom“ треба да ги преземат најопасните воени задачи.

ЛеБланк го опишува MK1 како „најмоќниот мултиалат на светот“, бидејќи може да носи 20 килограми товар – а во оптимални услови и до 36 килограми – додека чини околу 150.000 долари за производство, сума што би можела да се преполови со масовно производство. „Ако треба да постави експлозив на врата за да избегнеме да испратиме деветнаесетгодишен војник – може. Ако треба прв да влезе во зграда – може“, додава тој.

Компанијата со околу 50 вработени веќе води разговори со американската армија, военото воздухопловство, маринците и Министерството за домашна безбедност („DHS“). Хуманоидни роботи би можеле да патролираат по граници или да работат во опасни средини, но од „DHS“ засега велат дека „нема официјална најава“ за набавка на вакви системи.

„Foundation“ веќе има десетина активни роботи – во автомобилска фабрика во Атланта и кај два производители на широка потрошувачка – а до крајот на следната година планира производство на до 10.000 „Phantom“ единици. Компанијата е во завршна фаза на прибирање повеќе од 100 милиони долари, со проценета вредност од околу една милијарда долари, а интересот на инвеститорите може да ја подигне проценетата вредност и до 3,5 милијарди.

Не значи дека роботот е безгрешен

Иако амбициите се големи, „Phantom“ сè уште не функционира совршено. Роботот патувал 4.600 километри во голем пластичен куфер, но по пристигнувањето во Њујорк тимот морал целосно да го расклопи и повторно да го состави. По неколку обиди, конечно успеал да стане — но недолго потоа се срушил среде демонстрација.

Патак го припиша несмасниот момент на новата компјутерска плочка што била вградена непосредно пред патувањето. И покрај тоа, роботот успеал да разговара со посетителите и дури накратко да „работи“ на рецепцијата, збунувајќи ги вработените кои очекувале човек.