Изразот кој постојано се поврзува со биткоинот е – волатилност. Вредноста на оваа криптовалута за кратко време може драматично да порасне, но исто така може да заврши и во длабок минус. Тоа добро го знаат сите кои некогаш инвестирале во биткоин и други криптовалути. Такви периоди се неизбежни и јасно е дека криптопазарот не оди секогаш само во една насока – нагоре.

Моментално сме во период на силен пад. Пред нешто повеќе од еден месец биткоинот ја достигна највисоката вредност во својата историја и се приближи до неверојатните 125 илјади долари, но по тоа кривата нагло тргна надолу. Сега се доближува до бројката од 80 илјади долари, и не би требало да нè изненади доколку до крајот на денот падне и под таа граница.

Колку ќе падне вредноста?

Иако инвеститорите се навикнати на минуси, кога започнува голем пад секој се прашува: до кога? Дали е време за продажба – или можеби за купување? Одговорот, секако, никој не може да го даде, токму поради волатилноста и непредвидливоста на овој пазар.

Но затоа е корисно да се слушнат мислењата на различни аналитичари. На почетокот на годината владееше голем оптимизам. Експертите со кои тогаш разговараше „CNBC“ веруваа дека биткоинот ќе ја заврши годината длабоко над 100 илјади долари, додека најголемите оптимисти спомнуваа дури и 250 илјади долари. До крајот на годината остануваат уште 40 дена – и сè може да се промени, на подобро, но и на полошо.

Моментално, состојбата на капиталните пазари е таква што инвеститорите масовно продаваат и бегаат од ризична актива – меѓу другото и од крипто.

Дали се повторува 2018?

Што се однесува до биткоинот и другите криптовалути, аналитичарот на „Bloomberg“, Мајк МекГлоун, ја споредува сегашната ситуација со онаа од 2018 година, кога по големиот раст – на чиј бран многумина се збогатија – уследи драматичен пад. Вредноста тогаш падна од 10 на 3 илјади долари за многу кратко време.

МекГлоун гледа слична структура и денес: нагол раст, предолго задржување на врвот, па остар пресврт надолу.

Следејќи ја таа логика, тој смета дека следува нов голем пад на биткоинот и дека вредноста може да се спушти дури на – 10 илјади долари. МекГлоун наведува повеќе аргументи: зголемување на бројот на токени што ја разредува ликвидноста и врши притисок врз цените, потоа ETF-овите во кои луѓето инвестирале кога цената веќе била преголема, а сега вложувањата опаѓаат, како и слабите макроекономски услови. Според него, пазарот изгледа кревко и без јасен сигнал дека падот ќе запре.

Сепак, моментално изгледа невозможно цената да се спушти толку ниско, затоа што денешната ситуација околу криптото и неговата општа прифатеност е многу поинаква од онаа пред седум години. Големи падови отсекогаш се можни, но пазарот денес е многу позрел, со одредени механизми на стабилизација – бидејќи во крипто се вклучени институционален капитал, ETF-ови, како и бројни инвеститори што не планираат да продаваат и на биткоинот гледаат како на долгорочен имот.