Школката е направена од околу 101 килограм злато и е целосно функционална. Почетната цена се базирала на цената на златото на денот на аукцијата, објави „Сотби“ пред продажбата. Во вторник, 101 килограм 18-каратно злато вределе околу 10 милиони долари.

Кателан (65) изработил две верзии на златната тоалетна школка во 2016 година и двете ги нарекол „Америка“.

Едната била изложена во музејот Гугенхајм во Њујорк пред да биде украдена во 2019 година од палатата Бленхајм, родното место на Винстон Черчил во Англија, каде што била позајмена.

Втората верзија била продадена во 2017 година на приватен колекционер, на аукција. Според американските медиуми, колекционерот е милијардерот Стив Коен, сопственик на бејзбол тимот Њујорк Метс.

Тоалетната школка предизвика возбуда

Аукцијата на ова уметничко дело предизвика доста возбуда за време на подготовките за продажбата и со нетрпение се очекуваше.

Пред продажбата, „Америка“ била изложена во бањата на новото седиште на „Сотби“, но за разлика од претходните изложби, посетителите овој пат немале можност да ја користат од безбедносни причини.

Самоукиот италијански уметник по потекло од Падова, Кателан, изгради репутација врз своите необични концептуални уметнички дела. Минатата година, банана залепена на ѕид наречена „Комичар“ беше продадена во Њујорк за 6,2 милиони долари. После тоа, купувачот, крипто-милијардерот Џастин Сан, јавно ја изеде.

Неговите други дела, исто така, редовно предизвикуваат жестока дебата и медиумско внимание, честопати ставајќи го во центар на контроверзии.