Во утринските часови на аеродромот во Будимпешта слетал еден од најскапите приватни авиони на светот, а неговото појавување го привлече вниманието на јавноста.
Имено, на аеродромот слетал авион чиј сопственик е султанот на Брунеј, Хасанал Болкија, а „Boeing 747“ е познат по својот луксуз и екстраваганција.
Појавата на овој авион е голем настан во било која земја, затоа што не станува збор само за голем патнички авион, туку за вистинска летечка палата што е лично сопствеништво на еден од најбогатите владетели во светот.
Авионот е базиран на „Boeing 747“, кој првично го користела „Lufthansa“, а подоцна бил додаден во флотата на султанот. Самата основна верзија на авионот чинела повеќе од 200 милиони долари, но тоа не е сè – султанот дал целосно да се реновира кабината со цел да создаде внатрешност која наликува на кралска резиденција.
Наводно потрошил уште 100–150 милиони долари на тоа, со што вкупната вредност на авионот се искачила на дури 400 милиони долари.
Многу луѓе го нарекуваат авионот „летечка палата“, и тоа не е без причина. Кабината е украсена со позлатени детали, тоалетите наводно имаат мијалници изработени од вистинско злато, ѕидовите имаат специјални кристални и дрвени интарзии, а дневниот престој и просторот за состаноци изгледаат како да се подигнати во воздух директно од луксузна палата.
Авионот има и спални соби, приватна бања, ексклузивна трпезарија и конференциска сала, бидејќи султанот често го користи за службени и дипломатски патувања.
Интересно е што самиот султан е професионален пилот, па не е необично и тој самиот да седи во кокпитот на авионот.
За причината за неговото моментално доаѓање во Будимпешта сè уште нема објавено многу информации, но слетувањето на авионот на султанот привлече огромно внимание на социјалните мрежи: ретко кога на европските аеродроми може да се види приватен авион од ваква големина и со вакво ниво на луксуз.
