Националната здравствена служба на Велика Британија (НХС) ги предупреди граѓаните да обрнат внимание на кашлицата што трае три недели или подолго, бидејќи може да биде знак за посериозни здравствени проблеми, вклучително и рак на белите дробови.
Важно е да се напомене дека кашлицата не е секогаш алармантна. Често се појавува како резултат на сезонските инфекции, како што се настинки, грип или ковид, но може да биде и резултат на алергии, поленска треска или изложеност на иританти како што се прашина и чад.
Меѓутоа, НХС нагласува дека секоја кашлица што не исчезнува по три недели заслужува внимание и потенцијална лекарска проценка, пренесува британски „Мирор“.
Покрај самата кашлица, постојат и други симптоми на кои треба да се обрне внимание, како што се долготрајна кашлица што се влошува, чести инфекции на градите, искашлување крв, болка при дишење или кашлање, постојан отежнато дишење, хроничен замор, губење на апетит или необјаснето губење на тежината. Помалку вообичаени знаци на рак на белите дробови може да вклучуваат промени на прстите, тешкотии при голтање, свирење во градите, засипнатост, отекување на лицето или вратот и упорна болка во градите или рамото.
Дијагнозата обично започнува со разговор со матичен лекар, кој ќе дознае повеќе за вашите симптоми и општата здравствена состојба. Лекарот може да побара од пациентот да направи спирометрија, тест што ја мери количината на вдишан и издишан воздух, или анализа на крвта, за да се исклучат други причини за кашлица и симптоми.
Националната здравствена служба на Велика Британија нагласува дека пушењето цигари е најзначајниот фактор на ризик за развој на ракот на белите дробови, кој е одговорен за дури седум од 10 случаи. Покрај тоа, изложеноста на радон, азбест, испарувања на јаглен и кокс, како и други штетни супстанции, може да влијае на развојот на болеста.
Со оглед на тоа колку ракот на белите дробови е смртоносен, важно е да се реагира на симптомите што е можно поскоро. Раната дијагноза значително ги зголемува шансите за успешен исход од лекувањето и спасува животи, па затоа експертите нагласуваат дека не треба да ја игнорираме упорната кашлица и редовно да го следиме своето здравје.
Во текот на есента и зимата, кога вирусите се поактивни, а воздухот е постуден и посув, важно е да се обрне поголемо внимание на здравјето на респираторните органи. Треба редовно да ги проветрувате просториите, а се препорачува да пиете доволно течности, да јадете балансирана исхрана богата со овошје, зеленчук и храна со витамин Ц и цинк, како и да избегнувате чад од тутун и престојување во зачадени простории.
