Бројни истражувања ја потврдуваат поврзаноста помеѓу квалитетот на сонот и кардиоваскуларното здравје – луѓето кои спијат лошо имаат поголема склоност кон развој на срцеви проблеми, додека лицата со веќе постоечки срцеви заболувања често страдаат од несоница. Токму затоа, многумина посегнуваат по додатоци кои треба да им помогнат полесно да заспијат и да одржат квалитетен сон.

Еден од најпопуларните такви додатоци е мелатонинот, хормон што телото природно го произведува за регулирање на циклусот на спиење и будење, но кој исто така се продава слободно во различни дози. Сепак, ново истражување открива дека возрасни лица со несоница кои земале мелатонин најмалку една година имаат поголеми стапки на срцева слабост, хоспитализации и смртност во споредба со оние кои не го користеле.

Иако студијата не докажува дека мелатонинот директно ги предизвикува овие последици, таа предупредува на можен ризик – особено затоа што многу луѓе го земаат долгорочно без лекарски надзор.

Додатоците како мелатонинот треба да се користат внимателно и со совет од експерти

Истражувањето анализирало повеќе од 130.000 возрасни лица со дијагностицирана несоница, користејќи податоци од меѓународната база „TriNetX“, која вклучува болнички и клинички евиденции. Биле споредени две групи – лица со документирана употреба на мелатонин подолго од една година и оние што не го користеле овој додаток.

Резултатите покажале дека 4,6 проценти од долготрајните корисници развиле срцева слабост, во споредба со 2,7 проценти кај оние кои не земале мелатонин. Хоспитализациите биле значително почести кај корисниците (19 проценти наспроти 6,6 проценти), а смртни случаи биле забележани кај 7,8 проценти од корисниците, во споредба со 4,3 проценти кај оние кои не го користеле додатокот.

Експертите нагласуваат дека индивидуалниот ризик останува релативно мал, но имајќи ја предвид широката употреба на мелатонинот, дури и мало зголемување на ризикот е важно на ниво на целата популација. Студијата покажува поврзаност, а не директна причинско-последична врска, бидејќи лицата кои го користат долгорочно може да имаат потешки форми на несоница, нелекувана апнеја при спиење или други здравствени состојби кои влијаат и на сонот и на срцето.

Сепак, заклучокот на истражувачите е јасен – иако поголемиот дел од корисниците нема да развијат сериозни компликации, додатоците како мелатонинот треба да се користат внимателно и секогаш во консултација со експерти.