Во последните години, Холивуд е преплавен со продолженија на успешни франшизи кои им донесоа на своите автори и студија милионски приходи и рушеа рекорди на гледаност. Можеби единствено „Titanic“ не може да добие втор дел — од очигледни причини.
Следната година или во 2027 се очекува во кината да пристигнат новите изданија на „Batman“, „Shrek“, „The Lord of the Rings“ и „The Devil Wears Prada“. Се зборува и дека Џони Деп би можел повторно да им се придружи на „Pirates of the Caribbean“. Но, ќе се вратат ли Брендан Фрејзер и Рејчел Вајс во „The Mummy“?
Како што известува „Variety“, двајцата добитници на „Оскар“ најверојатно повторно ќе ги здружат силите во улогите на галантниот легионер Рик О’Конел и храбриот египтолог Евелин Карнахан.
Првите два дела беа неверојатно успешни. Во третиот, прекрасната Рејчел — која во меѓувреме стана мајка — ја замени Марија Бело. А сега, по 25 години, оригиналниот пар би можел повторно да застане пред камерите.
Имаше и уште една „Мумија“ со Том Круз, но обожавателите не ја сметаат за дел од нивната омилена франшиза.
Брендан како да ја отворил Египетската книга на мртвите — или како да бил проколнат со фараонова болест, како првите истражувачи кои влегле во тајните одаи на пирамидите во Гиза. При снимањето на третиот дел, тој сам ги изведувал каскадерските сцени и се здобил со тешки повреди: напукнато ребро, исчашен пршлен што предизвикал проблеми со ’рбетот, повреда на коленото, па дури и пукање на гласните жици.
Поради бројните комплицирани операции, повеќе време поминувал во болници отколку во филмски студија. Иако лекарите го уверувале дека ќе се врати на работа, закрепнувањето траело долги седум години, за време на кои значително се здебелил.
Кога конечно повторно можел да застане на нозе, режисерите одбивале да му понудат улоги поради неговата прекумерна тежина. А неволјите никогаш не доаѓаат сами — го погодил и тежок развод, при што неговата поранешна сопруга барала астрономски износи за старателство над нивните три деца.
На сето тоа се надоврзала и траумата од сексуално злоставување што го доживеал во 2003 година. Многумина не верувале во приказната дека тогашниот претседател на „Hollywood Foreign Press Association“, Филип Берк, го силувал. Брендан тогаш имаше 35 години, важеше за физички силен актер со забележителни улоги во акциони филмови — но, како што самиот рече, тоа сепак се случило.
Смртта на неговата мајка, за која бил многу врзан, бил последниот удар. Фрејзер паднал во длабока депресија, се здебелил уште повеќе и практично престанал да излегува од дома.
Се плашел да користи интернет, затоа што станал предмет на потсмев и јавна осуда. Со секоја нова фотографија што ја објавувале папараците, следеле подбивни коментари: „Не јади јаглехидрати, ќе завршиш како Фрејзер“, „Денес сакав да го прескокнам тренингот, но ги видов овие фотографии и веќе трчам на лентата“...
Години наназад всушност не ни потсетувал на оној мускулест, шармантен маж од џунглата, по кого воздивнуваше женската публика. Ниту можел да ја надмине траумата, ниту да најде инспирација да продолжи понатаму.
Кога бил на работ на целосно повлекување од глумата, се појавил неговиот „ангел чувар“ — славниот режисер Дарен Аронофски, кој му го понудил сценариото за драмата „The Whale“, приказна за професор по книжевност тежок 270 килограми.
Фрејзер прифатил, не знаејќи дека токму таа улога ќе му го врати животот – и кариерата. Издржал ригорозни терапии, вежбал посветено и ги симнал килограмите.
По премиерата на филмот на Венецијанскиот филмски фестивал, публиката го поздрави со повеќеминутни овации, кои го доведоа до солзи. Шест месеци подоцна, повторно се расплака кога го освои Оскарот за најдобра машка улога.
Од тој момент, понудите повторно почнале да пристигнуваат. А човекот со безграничен талент веќе не се плаши од враќање на „The Mummy“.
Сега останува само „Universal Pictures“ – студиото што ги држи сите детали во строга тајност – официјално да ја потврди веста.
