Овој мрачен монолит на адресата „33 Thomas Street“ со децении ја буди љубопитноста на минувачите и љубителите на теории на заговор.

Зградата е толку загадочна што и славниот актер Том Хенкс во 2017 година на „X“ (тогашниот „Твитер“) збунето напиша: „Ова е најстрашната зграда која некогаш сум ја видел! Што, по ѓаволите, прават внатре?“.

Телекомуникациски џин од минатото

Со текот на годините околу зградата се појавија најразлични теории на заговор, но вистинската позадина, иако помалку филмска, сепак е интересна.

ТикТокерот Ерик Гидри објасни дека зградата, заедно со стотици слични низ САД, била дел од мрежата „AT&T Long Lines“.

Изградена во 1970-тите, служела како огромен центар за пренасочување на телефонски повици во ерата пред дигиталната комуникација. Тогаш телефонските линии биле физички поврзани, а објектите биле исполнети со опрема и машини.

„Тоа значи дека не им биле потребни вистински човечки оператори“, појаснува Гидри. Бидејќи внатре речиси никој не престојувал, прозорците едноставно немале никаква цел – сè било подредено на функционалноста, а не на естетиката.

Тврдина што може да издржи нуклеарен удар

Необичноста на зградата не завршува со отсуството на прозорци. Проектирана е како една од најбезбедните градби во светот. Наводно е целосно самостојна – располага со сопствени резерви на гас, вода и електрична енергија доволни за да функционира целосно одвоено од надворешниот свет до две недели.

Се смета и дека е дизајнирана да издржи нуклеарна експлозија – се разбира, „во разумни граници“, како што објаснува Гидри.

Денес, кога повеќето телекомуникациски системи се дигитализирани и минијатуризирани, зградата веќе не е клучна за класичните телефонски повици, но и понатаму има важна улога во мрежната и интернет-инфраструктура.

„Ако го гледате ова од САД, постои голема веројатност видеото да поминало токму низ една ваква зграда“, додава Гидри.

Шпионско гнездо или само ладен технолошки центар?

Каде што има таинственост, се појавуваат и приказни за шпионажа. Со години кружат шпекулации дека во оваа зграда се наоѓа надзорен центар на американската Национална агенција за безбедност („NSA“).

Непрофитната организација „The Intercept“ објави дека постојат доволно индиции за да се смета дека овие тврдења можат да бидат вистинити, а дел од информациите наводно потекнуваат од свиркачот Едвард Сноуден.

Сомнежите дополнително ги поттикнал поранешен инженер на „AT&T“, кој тврдел дека во зградата се наоѓа „главен пристапен прекинувач“ што ги поврзува повиците од САД со остатокот од светот.

Колку има вистина во сето тоа, тешко е да се каже. Но целосната приказна за тоа што навистина се случува зад дебелите бетонски ѕидови на „33 Thomas Street“ веројатно никогаш нема да биде откриена на пошироката јавност – што на оваа веќе легендарна зграда ѝ додава уште мала доза мистичност.