Дубаи го престигна Њујорк и го зазеде првото место на глобалната листа на најпосакувани градови за светската елита, покажува денес објавениот извештај на британската компанија „Savills“.
Ранг-листата опфаќа 30 светски метрополи, а резултатите укажуваат на сè поголема привлечност на градови со поволни даночни услови, стабилно регулаторно опкружување и развиена инфраструктура погодна за семејства.
Дубаи привлекува богати жители благодарение на финансиски модел без данок на наследство, капитална добивка и лично богатство – фактори клучни за управување со приватен капитал, пренесува „Bloomberg“.
Според извештајот, Дубаи има најголем број меѓународни училишта во однос на сите дестинации од индексот, со постојано зголемување на листите на чекање, бидејќи нови семејства се доселуваат во Обединетите Арапски Емирати. Безбедноста на градот и високото ниво на комунални услуги дополнително влијаат на изборот на доселениците.
Дополнително, Дубаи успешно ја применува визната политика. Програмата за т.н. „златна виза“ овозможува престој до 10 години за инвеститори кои вложат најмалку два милиони дирхами (повеќе од 470.000 евра).
Овој пристап ја намалува регулаторната неизвесност и го олеснува долгорочното планирање на престој и деловни активности за претприемачи, финансиски експерти и технолошки инвеститори.
На второто место се наоѓа Њујорк, кој и понатаму е водечки финансиски центар со силен прилив на капитал, но неговите недостатоци остануваат високите трошоци за живот и даноците.
Спротивно на тоа, Лондон – иако високо оценет за квалитетот на живот – падна на листата поради даночната политика и оптоварувањата на наследство и луксузни недвижнини.
Градовите со ниски или непостоечки даноци на наследство, како Дубаи, моментално имаат јасна предност во глобалната трка за привлекување капитал и многу богати жители, се истакнува во извештајот.
