Веста доаѓа откако Израел во вчера вечерта ги презеде останките на уште двајца заложници од Црвениот крст, додека расте притисокот врз Хамас да го забрза предавањето на преостанатите починати Израелци, објавува „Скај њуз“.

ИДФ во соопштението изјави дека го информирале семејството на Ронен Томи Енгел дека неговото тело е вратено за погреб, откако е завршен процесот на идентификација во Националниот институт за судска медицина.

„Ронен Томи Енгел беше убиен од терористи на Хамас на 7 октомври 2023 година, кога излегол да го брани своето семејство од терористи, а неговото тело беше однесено во Појасот Газа. Ронен, на 54 години во времето на неговата смрт, беше киднапиран од неговиот дом во Нир Оз“, се вели во соопштението.

„Тој беше прогласен за мртов на 1 декември 2023 година. Неговата сопруга, Карина, и неговите две ќерки, Мика и Јувал, исто така беа киднапирани и вратени како дел од договорот за ослободување на заложниците во ноември 2023 година.“

Тензии околу преминот Рафа

Предавањето на телата се случи во услови на зголемени тензии околу затворањето на граничниот премин Рафа помеѓу Газа и Египет. Канцеларијата на израелскиот премиер Бенјамин Нетанјаху објави во саботата навечер дека преминот ќе остане затворен „до понатамошно известување“, бидејќи рокот за Хамас да ги врати телата на заложниците е истечен.

Нетанјаху предупреди дека повторното отворање на преминот зависи од тоа дали Хамас ќе го исполни својот дел од договорот и ќе ги врати останките на сите 28 починати заложници. Со последното предавање, бројот на вратени тела се искачи на 12, оставајќи уште 16. Според договорот, сите 28 тела требаше да бидат предадени до минатиот понеделник.

Кревко примирје

Враќањето на останките, заедно со испораката на хуманитарна помош во Газа и прашањето за иднината на опустошената територија, е една од клучните точки во процесот на прекин на огнот што треба да ја заврши двегодишната војна.

Целосното отворање на преминот Рафа би им овозможило на жителите на Газа да побараат медицинска помош, да патуваат во странство или да ги посетуваат семејствата во Египет. Сепак, останува нејасно кој ќе управува со тешко оштетената страна од преминот по завршувањето на војната.