Американскиот претседател Доналд Трамп и рускиот претседател Владимир Путин договориле средба во Будимпешта.
Унгарскиот премиер Виктор Орбан со воодушевување го поздрави договорот и ја нарече Унгарија „остров на мирот“. И покрај потерницата на Меѓународниот кривичен суд, Унгарија му гарантира заштита на Путин. Според аналитичарите, авионот на Путин ќе следи јужна рута преку Турција, Грција, Црна Гора и Србија, слетувајќи во близина на Сегед, избегнувајќи непријателски земји. Плановите вклучуваат итни слетувања на резервни писти, со засилено обезбедување. Меѓутоа Путин доби предупредување.
Имено тој добил предупредување од својот близок сојузник да не патува во Унгарија поради наводниот „британски заговор“. Како што пишува „Експрес“, Андреј Безруков, поранешен полковник на руската служба за надворешно разузнавање СВР и професор на Московскиот државен институт за меѓународни односи, го предупредил Путин дека Будимпешта може да биде „стапица за британската разузнавачка служба“.
„Не оди во Будимпешта. Загрижен сум“, рекол Безруков во емисијата на пропагандистот Владимир Соловјов на руската државна телевизија. Тој предложил средбата да се премести во Дубаи (неутрална локација) за да се избегне она што го нарекол „апсолутно подмолна операција“ од страна на Британците.
Безруков, чија шпионска кариера била разоткриена во 2010 година во голема операција на ФБИ против руски агенти во САД, тврди дека британската елита го гледа Путин како главна закана. „Целиот менталитет на Британците е структуриран на таков начин што ако Путин не постои, нема проблеми. Русија ќе се распадне“, истакнал тој. Тој додал дека владејачката класа во Лондон, соочена со „падот“ на Велика Британија, е подготвена да ризикува сè, вклучително и Трета светска војна, за да го елиминира рускиот лидер. Но, Безруков не понудил никакви конкретни докази за своите тврдења. Британските функционери ги нарекоа тврдењата апсурдни. МИ5 неодамна предупреди за руски хибридни закани. Аналитичарите го гледаат ова како класична руска дезинформација.
Прекинот на огнот во Украина треба да биде предмет на дискусија на средбата меѓу Трамп и Путин во Будимпешта. Володимир Зеленски изрази загриженост, нарекувајќи го евентуалниот договор „кошмар“ за Киев. По средбата во Белата куќа, Зеленски го повика Трамп да не попушта пред руските барања и да размисли за испорака на ракети „Томахавк“ во Украина.
Дека Унгарија ќе обезбеди Путин да може непречено да влезе на нејзина територија за да се сретне со Трамп и успешно да се врати во Русија, неодамна рече и унгарскиот министер за надворешни работи Петер Сијарто.
„Нема потреба да се консултираме со никого за ова, ние сме суверена земја. Ќе го пречекаме Путин со почит, ќе го угостиме и ќе му обезбедиме услови да преговара со американскиот претседател“, изјавил тој. Унгарскиот премиер Виктор Орбан, познат по своите критики за санкциите на ЕУ против Русија, гледа можност да ја позиционира Унгарија како неутрален посредник. „Будимпешта е идеално место за дијалог меѓу светските сили“, рекол советникот на Орбан, Балаж Орбан, потсетувајќи на успешното угостување на Нетанјаху. Сепак, овој потег предизвикува критики во Брисел и меѓу членките на НАТО.
Денес
