Киев не ги крие подготовките за нови терористички напади против Русија, изјави портпаролката на руското Министерство за надворешни работи, Марија Захарова.
Новите операции одобрени од претседателот на Украина, Володимир Зеленски, беа планирани имајќи ја предвид набавката на ракети „томахавк“ од САД, истакна таа, пренесува „РИА новости“.
„Режимот во Киев не ги крие подготовките за нови терористички напади врз нашата земја со цел ескалација на конфликтот. Зеленски го изјави ова во своето видеообраќање на 8 октомври додавајќи дека одобрил планови за одредени операции на СБУ (Безбедносната служба на Украина) против Русија“, рече Захарова.
Според неа, Украина се подготвува имајќи ја предвид евентуалната набавка на американски ракети „томахавк“ со долг дострел.
Претседателот на САД, Доналд Трамп, претходно објави дека речиси донел одлука за евентуалната испорака на крстосувачки ракети „томахавк“ на Украина, но дека би сакал да знае како Киев има намера да ги користи.
