Генерацијата Z се соочува со тешка реалност – факултетските дипломи повеќе не се гаранција за работа со добра плата и сигурна перспектива.
Како што вештачката интелигенција презема сè – од програмерски позиции до аналитичари на почетно ниво – бројот на достапни работни места за младите значително се намалува, оставајќи ги во неповолна позиција.
Извршниот директор на компанијата „LinkedIn“, Рајан Рослански, предупредува дека во иднина работодавците сè помалку ќе бараат кандидати со престижни универзитетски дипломи, а сè повеќе оние кои знаат да користат алатки на вештачка интелигенција и кои се подготвени да се адаптираат на новите начини на работа.
„Мислам дека промената во начинот на размислување е највозбудливата работа. Моето убедување е дека иднината на работата повеќе нема да им припаѓа на луѓето со најскапи дипломи и универзитети, туку на оние што се прилагодливи, подготвени да учат и да прифатат нови алатки“, изјави Рослански за време на разговор во Сан Франциско, пренесува „Business Insider“.
Таквиот став го делат и бројни светски бизнис-лидери. Меѓу нив е и основачот на „Meta“, Марк Закерберг, кој потсетува дека факултетите ги туркаат младите во огромни долгови, а не ги подготвуваат доволно за реалниот пазар на труд. „Ќе дојде до неизбежно преиспитување – можеби не мора секој да оди на факултет. Луѓето сè повеќе го сфаќаат тоа“, изјави шефот на „Фејсбук“.
Банкарскиот магнат Бил Винтерс, извршен директор на банката „Standard Chartered“ со вредност од 40 милијарди долари, исто така призна дека неговиот MBA (Master of Business Administration) бил „губење време“, бидејќи вештините што ги стекнал таму со текот на годините ја изгубиле својата вредност пред налетот на револуцијата на вештачката интелигенција.
Сем Алтман („OpenAI“), Џек Дорси („Twitter“ и „Block“) и Дајлан Филд („Figma“) се на листата на успешни луѓе без факултетска диплома.
Дури и легендарниот инвеститор и претседател на „Berkshire Hathaway“, Ворен Бафет, отворено вели дека никогаш не го интересирало каде кандидатот студирал:
„Никогаш не гледам каде некој студирал. Секако, постојат одлични менаџери од најпрестижните универзитети, но има и такви од помалку познати – па дури и без диплома – и тоа воопшто не ги спречило да станат најдобрите во својата работа.“
