Готово е: Ова е последниот произведен „Ford Focus (ST)“

По повеќе од 16 милиони продадени примероци и четири генерации, „Ford“ реши да стави крај на уште еден популарен модел. Смртната пресуда за „Focus“ за многумина е и смртна пресуда за „Ford“, барем во Европа, каде што поради укинување на одредени модели и силната електрификација, продажбата драстично падна.

Знаевме дека овој ден ќе дојде, но тоа не ја прави разделбата полесна. „Ford“ завршува децении традиција на спортски компактни автомобили со укинувањето на „Focus ST“. Последниот примерок излезе од производната лента во фабриката во Саарлуис, Германија, во петокот на 26 септември. Иако „Blue Oval“ сè уште го произведува стандардниот „Focus“, ниту тоа нема да трае долго – производството целосно завршува за еден месец.

Книгите за нарачки за „Focus ST“ беа затворени уште пред неколку месеци, па неговиот крај беше очекуван. Укинувањето на „Focus ST“ доаѓа само неколку години по укинувањето на помалиот „Fiesta ST“, а потоа и на целата „Fiesta“. Извршниот директор Џим Фарли ја бранеше оваа одлука минатата година, велејќи дека компанијата на тие модели не остварувала профит, иако биле „омилени меѓу бројни купувачи“.

Гаснењето на „Fiesta“ во 2023 година и на „Mondeo“ една година претходно сериозно ја ослабна присутноста на „Ford“ во Европа. Неговиот пазарен удел на континентот сега изнесува само 3,3 проценти, додека, на пример, „Hyundai“ и „Kia“ држат по 4 проценти.

Според податоците на Европското здружение на производители на автомобили (ACEA), „Ford“ во првите осум месеци од годинава продал само 260.342 возила. „VW“ испорачал речиси три и пол пати повеќе, без да се бројат подбрендовите. Само „Škoda“ речиси го удвоила обемот на „Ford“, што јасно покажува колку овој некогашен гигант паднал.

Гаснењето на „ST“ дополнително го нагласува фактот дека европскиот сегмент на спортски компактни автомобили сè повеќе исчезнува. Неодамна ја изгубивме и „Honda Civic Type R“ поради построгите еколошки стандарди. „Hyundai i20 N“ и „i30 N“ веќе беа укинати, додека модели како „Peugeot 308 GTi“ одамна се заборавени. Сепак, опции сè уште постојат: „VW“ и понатаму ги нуди „Polo GTI“ и „Golf GTI/R“, „Cupra“ има „Leon“, а „Audi“ ги нуди „S3“ и „RS3 Sportback“.

Посебни признанија заслужуваат и „BMW M135i“, „AMG A35/A45“ и „Toyota GR Yaris“. Кој знае, можеби ќе пристигне и „GR Corolla“. Но, со оглед на „Euro 7“ стандардот и 2035 година, која може да означи крај на новите автомобили со мотори на внатрешно согорување, јасно е дека спортските компакти на фосилни горива изумираат.

Производителите се обидуваат да ги привлечат ентузијастите со електрични алтернативи како „Abarth 500e“, „VW ID. 3 GTX“ и „Peugeot E-208 GTi“, но јасно е дека тие не можат да бидат ни сенка на своите октански претходници.

Што се однесува до фабриката во Саарлуис, таа ќе остане отворена до крајот на 2032 година. Иако автомобилското производство таму наскоро престанува, ќе се задржат околу 1.000 работни места. Се спомнуваат нови модели, но „Ford“ сè уште не открил каде ќе се произведуваат. Се зборува и за нов „Focus“, но овој пат како SUV, позициониран меѓу „Puma“ и „Kuga“.

И покрај сè, многумина сè уште се надеваат дека „Ford“ ќе се врати на вистинските автомобили, особено ако се има предвид долгата традиција на компактни модели во Европа.