[ВИДЕО] Насилство на патот: Погледнете како возач на автомобил намерно удри мотоцикл

Агресивното однесување во сообраќајот никогаш не е паметен потег, но особено е опасно кога еден од учесниците управува со мотоцикл. Токму тоа се случи пред неколку дена на автопатот во Бивертон, во сојузната држава Орегон.

Снимката прикажува сообраќај на пат со три ленти, каде што се гледа расправија помеѓу возачите на две возила. Мотоциклистот гестикулира кон отворениот совозачки прозорец на автомобил марка „Kia“, додека двете возила се движат со иста брзина. Во еден момент, возилото нагло свртува надесно, намерно го удира мотоциклистот и го турка од втората во третата лента. Дури по судирот, возачот на „Kia“ ја исправува насоката, останува во третата лента и бега од местото на несреќата.

Бидејќи станува збор за ненадеен настан, мотоциклистот е неподготвен и не може оптимално да реагира. Ударот е доволно силен за да го исфрли од патеката и да го собори од мотоциклот.

По овој чин на насилство, полицијата соопшти дека трага по возилото марка „Kia“ и возачот кој бил зад воланот во моментот на инцидентот. Властите го опишуваат возачот како маж на возраст меѓу 30 и 40 години, со црна брада.

Коментаторите на „Facebook“ страницата на полицијата тврдат дека возачот на „Kia“ повеќепати му го пресекол патот на мотоциклистот пред несреќата. Еден сведок, кој тврди дека бил на местото на настанот, ја опишал низата на настани: „SUV речиси го удри моторот претходно додека менуваше лента. Моторот беше зад SUV-то, се префрли во средната лента, му покажа среден прст и нешто си дофрлуваа бидејќи совозачкиот прозорец беше спуштен. Потоа возачот на "KIA" се обиде да го убие.“

Иако точниот тек на настаните сè уште се истражува, едно е сигурно – насилството во сообраќајот никому не носи ништо добро. Возачот на „Kia“, штом биде уапсен, ќе се соочи со сериозни обвиненија кои засекогаш ќе му го сменат животот.