Едно лице е убиено, додека петмина се ранети во пукањето што се случило кратко по 14 часот во кафуле во белградската населба Вишњичка бања. Според неофицијални информации, убиена е жена Д.В. (51).
Непознати напаѓачи упаднале во кафулето Локал бар, кратко по 14 часот, и отвориле оган.
Една жена е убиена на лице место, а пет лица се ранети, според неофицијални информации. Засега е познато дека ранети се маж со иницијали О.А. (59) и жена Љ.М. (42).
Според првите и неофицијални информации, неколку вооружени лица излетале од возило, влегле во кафулето и отвориле оган. Според мештаните, станува збор за кафуле во кое во изминатиот период се собирале навивачи.
Засега не е познато дали нападот е поврзан со навивачите, односно не е познат мотивот.
Сосед кој денес бил сведок на пукањето изјавил за „Nova.rs“ дека напаѓачите го опколиле кафулето и дека, во моментот кога отвориле оган, настанал општ метеж бидејќи во тој момент неколку минувачи се нашле на улицата.
„Одеднаш слушнав истрели. На почетокот не знаев што се случува, но кога видов, се засолнив. Се пукаше од неколку страни. Имаше луѓе на улицата и на автобуската станица, сите избегаа“.
Полицијата е на местото на настанот и истрагата е во тек.
