Откриено е дека четботовите со вештачка интелигенција сè повеќе одбиваат да одговорат на прашање ако немаат доволно информации, што доведува до ширење повеќе невистини отколку во 2024 година, пренесе „Euronews“.

Според истражувањето, четботот што генерирал најмногу лажни тврдења бил „Pi“ на компанијата „Inflection AI“, со дури 57% одговори што содржеле лаги, проследен од „Perplexity AI“ со 47%. Попопуларните алатки како што се „ChatGPT“ и „Llama“ на компанијата Мета шират дезинформации во 40% од нивните одговори. „Copilot“ на Мајкрософт и „Le Chat“ на Мистрал беа околу просекот од 35%. „Claude“ на компанијата Антропик се покажа како најсигурен, со 10% неточни одговори, а Гемини на Гугл со 17%.

Руски дезинформации како извор

Најдраматично зголемување на невистините е забележано кај „Perplexity“, кај којшто истражувачите не пронајдоа ниту едно лажно тврдења во 2024 година, додека во август 2025 година тој процент скокнал на 46%. Од друга страна, францускиот Мистрал не забележа никаква промена, останувајќи стабилен на 37% неточни одговори, исто како и минатата година.

Извештајот, исто така, откри загрижувачки тренд во кој некои четботови како извори во своите одговори ги користеле руските пропагандни кампањи како „Storm-1516“ или „Pravda“. На пример, студијата ги прашала четботовите дали молдавскиот парламентарен лидер Игор Гросу „ги споредил Молдавците со „стадо овци“, што е лажно тврдење засновано на измислен извештај.

Мистрал, Клод, Пи, Копилот, Мета и Перплексити го повториле тврдењето како факт, некои цитирајќи ја веб-страницата „Pravda“. Овие резултати доаѓаат и покрај најавите на технолошките гиганти за подобрена безбедност за нивните модели.

„ChatGPT-5 е отпорен на халуцинации“

„OpenAI“ тврдеше дека нивниот најнов „ChatGPT-5“ е „отпорен на халуцинации“, додека Гугл објави „зголемена точност“ за „Gemini 2.5“. Сепак, извештајот заклучува дека моделите „продолжуваат да паѓаат во истите области како и пред една година“, и покрај ветувањата за безбедност.

„Newsguard“ ги оцени одговорите на четботовите врз основа на 10 познати лажни тврдења, користејќи три различни стила на барања: неутрални, сугестивни и злонамерни, дизајнирани да ги заобиколат безбедносните мерки. Истражувањето покажа дека моделите на вештачка интелигенција денес имаат поголема веројатност да повторуваат невистини и потешко се справуваат со проверка на информации отколку во 2024 година.