Тениската легенда Енди Мареј ќе се натпреварува на сосема поинаква спортска сцена. Следниот месец тој ќе учествува на престижниот „Alfred Dunhill Links Championship“ во неговата родна Шкотска, каде ќе ги одмери силите со некои од најголемите имиња во голфот, пренесува „mirror.co.uk“.
Турнирот ќе се одржи од 2 до 5 октомври на некои од најпознатите шкотски терени, меѓу кои се „Old Course St Andrews“, „Carnoustie“ и „Kingsbarns“. Посебна атракција на ова натпреварување е форматот во кој аматерите играат заедно со професионалците за награден фонд од 3,7 милиони фунти (околу 4,25 милиони евра).
Мареј: Ќе уживам
„Навистина со нетрпение го очекувам ова, навистина е посебно. А за еден Шкотланѓанец како мене, да имам можност да настапам во Шкотска, на толку уникатна локација, го прави сето тоа уште повредно. На многу начини, ’Old Course‘ во St Andrews е многу сличен на Централниот терен во Вимблдон“, изјави Мареј и додаде:
„И двата имаат исто историско чувство и атмосфера која едноставно не постои на многу спортски арени низ светот. Ќе уживам во ова искуство.“
Му беше тренер на Ѓоковиќ
Поранешниот најдобар тенисер на светот во својата кариера освои два Вимблдона, „US Open“ и вкупно 46 титули. Олимписки шампион е од Игрите во Лондон 2012 и Рио де Жанеиро 2016 година. По завршувањето на играчката кариера, се посвети на тренерската работа, а во еден период го предводеше и Новак Ѓоковиќ.
Соработката траеше само шест месеци – од ноември 2024 до мај 2025 година. Иако почетокот изгледаше ветувачки, особено со пласманот на Ѓоковиќ во полуфиналето на „Australian Open“, резултатите не ги исполнија очекувањата на двајцата.
