Исхраната се покажала како клучен фактор во зачувувањето на здравјето на мозокот. Истражувањата укажуваат дека прехранбени модели како медитеранската исхрана – богата со интегрални житарки, риба, овошје и зеленчук – можат да го намалат ризикот од деменција. Но, ново истражување отиде чекор понатаму и го испитуваше влијанието на одделни намирници врз когнитивните способности кај постари лица со повеќе хронични болести. Резултатите издвојуваат три групи намирници:

• печурки и алги

• јаткасти плодови

• млечни производи

„Печурките или алгите имаа најсилен ефект, на второ место се најдоа млечните производи, а потоа и јаткастите плодови“, наведуваат истражувачите, пренесува „EatingWell“. Се покажа дека токму печурките и алгите имаат најизразено позитивно дејство врз здравјето на мозокот, по што следуваат јаткастите плодови и млечните производи.

Она што го јадеме не влијае само на телото, туку и на умот

Дополнително, свежото овошје имало силна врска со ориентацијата (препознавање на место и време), додека зеленчукот и ориентацијата биле најмалку поврзани со другите когнитивни функции. Овие врски, според авторите на студијата, упатуваат на тоа дека одредени намирници можат директно да го поддржат паметењето и вниманието.

Заклучокот на истражувањето е јасен: исхраната игра голема улога во зачувувањето на когнитивните способности, особено кај постари лица кои веќе имаат хронични заболувања. Вклучувањето на печурки, јаткасти плодови и млечни производи во секојдневната исхрана може да придонесе за подобра концентрација и меморија.

Иако студијата не докажува директна причинско-последична врска, таа дава силна основа за идни истражувања и потсетува дека храната не влијае само врз телото – туку и врз умот.