Иако ниту една намирница сама не може да спречи деменција, нутриционистите истакнуваат дека еден зеленчук заслужува посебно место во чинијата, а тоа е спанаќот.

Воведување на салата од спанаќ или зелено смути во секојдневната рутина е начин да го поддржите здравјето на вашиот мозок.

Ја подобрува циркулацијата и оксигенацијата на мозокот

Спанаќот изобилува со нитрати кои го поттикнуваат протокот на крв и кислородот до мозочните клетки со што се подобрува работата на митохондрите, клучни за произведување енергија. Голема студија покажала дека секој внес на дополнителни 50 милиграми нитрати од зеленчукот како што е спанаќот, го намалува ризикот од развој на деменција за осум отсто.

Го поддржува помнењето и концентрацијата

Хроничните воспаленија во мозокот се поврзуваат со создавање амилоид-бета, карактеристичен за Алцхајмерова болест. Спанаќот е богат со лутеин, антиоксидант којшто ги штити невроните од оксидативен стрес и го подобрува помнењето и фокусот. Истражувањата покажале дека лицата со високо ниво лутеин имаат помалку мозочни промени поврзани со деменција.

Богат со фолати

Фолатот до неодамна се гледал како важен витамин само во текот на бременоста, но денес знаеме дека е клучен и за здравјето на мозокот во подоцнежниот живот. Половина шолја варен спанаќ задоволува речиси третина од дневната потреба за фолат којшто помага во намалување на хомоцистеинот и го поддржува „поправањето“ на ДНК во мозочните клетки.

Ја јакне врската меѓу цревата и мозокот

Здравјето на цревната флора директно влијае на функционирање на мозокот. Фитохемикалиите од спанаќот ја поттикнуваат антиоксидативната активност во цревата и ги намалуваат воспаленијата. Влакната од спанаќот ферментираат корисни бактерии кои потоа произведуваат масни киселини, дополнителен сојузник во чување на нервниот систем.