Потпретседателот на Соединетите Американски Држави, Џ. Д. Венс, изјави дека конфронтацијата со украинскиот претседател Володимир Зеленски, што се одржа во Овалната соба на Белата куќа во февруари, беше „корисна за американскиот народ“.
Во интервју за весникот „Ју-Ес-Еј Тудеј“ на 27 август, Венс нагласи дека дискусијата, иако невообичаена за јавноста, открила важни разлики во пристапот на американската и украинската страна. „Дали би сакал да видам јавна расправа во Овалната соба? Не нужно. Но, беше добро за американскиот народ да го види тоа“, рече потпретседателот.
Тој потсети дека постојат голем број заеднички интереси меѓу Вашингтон и Киев, но и одредени несогласувања. Венс особено ја критикуваше политиката на администрацијата на Џо Бајден, истакнувајќи дека за време на неговиот мандат, неколку милијарди долари биле испратени во Украина „без вистинска цел и без вистинска дипломатија“.
„Бајден немаше план да го заврши конфликтот. Украина стана бездна во која Америка фрлаше пари по секој проблем, без конкретно решение“, нагласи Венс.
Медиумите потсетуваат на инцидентот во Белата куќа се случи на 28 февруари за време на средбата меѓу американскиот претседател Доналд Трамп и Зеленски. Во присуство на новинари, размената на мислења се претвори во отворена расправија. Според медиумските извештаи, Трамп го прекори Зеленски за „непочитување на САД“, додека Венс истакна дека украинскиот лидер заборавил да му се заблагодари на Вашингтон за финансиската и воената помош.
После тоа, планираната прес-конференција беше откажана.
